ଶିମିଳିପାଳରେ ନୂଆବରଷ

ବରେହିପାଣି ଜଳ ପ୍ରପାତ
ଅଛି ଶିମିଳିପାଳେ
ପଶୁ ପକ୍ଷୀଏ ମିଶିକି ଦିନେ
ସେଇଠି ସଭା କଲେ।

ନୂଆ ବରଷ ପାଳିବା ପାଇଁ
ପ୍ରସ୍ତାବ ଦେଲା ହାତୀ
ବାଘରାଜା ବି ଜଣେଇଦେଲା
ଆପଣା ସନମତି।

କହିଲା ତହୁଁ "ଉତ୍ସବ କର
ତହିଁକି ନାହିଁ ମନା
ପରମ୍ପରା କୁ ପାସୋରି ଦେଇ
ହେବାନି ବାଟବଣା।

ମଣିଷ ସିନା ମନ ଖୁସିରେ
ଫୁଟାଉ ଅଛି ବାଣ
ପରିବେଶ ର ହେଉ ନାହିଁ କି
ତହିଁରେ ପ୍ରଦୂଷଣ?

କେଉଁଠାରେ ବି ଏଇଥି ପାଇଁ
ହେଉଛି କେକ୍ କଟା
ଏଇ ଦିନ ଟି ପାଳିବା ଆମେ
ତିଆରି କରି ପିଠା।

ରାତି ଅଧରେ ବିଲୁଆ ଯେବେ
ଡାକିବ ହୁକେ ହୁଆ
ତାଳି ମାରିକି ଗାଇବା ଆମେ
ନୂଆ ବରଷ ତୁ ଆ।"

ବାଘ ରାଜା ର କଥା କୁ ମାନି
ନୂଆ ବରଷ ପାଳି
ପଶୁ ପକ୍ଷୀଙ୍କ ମନରେ ଗଲା
ଖୁସି ର ଢେଉ ଖେଳି।

ଭାଲୁ ମନ୍ତିରି କହିଲା ତହୁଁ
ଖୁସିରେ ହୋଇ ଭୋଳ
"ଏହି ପରିକା ନୂଆ ବରଷ
ପାଳିବା ସବୁଥର"।
∎
ମଣ୍ଡୁଆ,କେନ୍ଦୁଝର ଗଡ
ମୋ ୯୪୩୭୭୫୨୩୯୫