କବିତା
ସବୁରି ମନରେ ଫୁଟାଇ ହସ
ନୂଆ ସକାଳର ସୁନେଲି କିରଣ
ଧୋଇଦିଏ ଆସି ଧରଣୀ ପାଦ
ଝରଣାର ଜଳ ବହେ କଳ କଳ
ସାଗରେ ମିଶଇ କେଡେ ଆନନ୍ଦ/
ଶିଶିର ପରଶେ ତରୁ ପଲ୍ଲବିତ
ଗୁଳ୍ମଲତା ସବୁ ଉଠିଲେ ଚେଇଁ
ପ୍ରକୃତିର କୋଳ କରି ଉଲ୍ଲସିତ
ସୁରଭିତ ହେଲା ମରତ ଭୂଇଁ /
ଖରା ଛାଇ ଏଠି ଖେଳେ ଲୁଚକାଳି
ସବୁଜ କ୍ଷେତରେ ସିଆର କାଟେ
ଉଡେ ଗେଣ୍ଡାଳିଆ ଝାଡ଼ି ଦେଇ ପର
ଗୋହିରୀ ବିଲର ମହିଷା ପାଟେ /
ମଳୟ ପଵନ ହୋଇ ଆନମନା
ଗାଏ ବସନ୍ତର ମଧୁର ଗୀତି
ଆମ୍ବ ବଉଳର ଫଗୁଣ ମହକ
କୋଇଲିର କୁହୁ ଉଲ୍ଲାସେ ମତି /
ନୀଳ ଗଗନରେ ପୁନେଇଁର ଚାନ୍ଦ
ବାଣ୍ଟଇ ମହକ ସଜ ଶେଫାଳି
ସବୁରି ମନରେ ଫୁଟାଇ ହରସ
ପରାଣେ ପୁଲକ ଦିଅଇ ଢ଼ାଳି /
ଜିଏ -423, କୈଳାସ ବିହାର
ଶୈଳଶ୍ରୀ ବିହାର, ଭୁବନେଶ୍ୱର -21
ମୋ -9437281155
ଲେଖା ସମ୍ପର୍କୀୟ ମତାମତ
ସଂଯୁକ୍ତା ପରିଚ୍ଛା
30-01-2024 / 14:37:00
ଶିଶୁ ମନଲାଖି ସୁନ୍ଦର କବିତାଟିଏ ।
ହରପ୍ରିୟା ପଟ୍ଟନାୟକ
29-01-2024 / 17:34:43
କବିତାଟି ଛନ୍ଦବନ୍ଧ ଓ ମନଛୁଆଁ।ଶିଶୁ ମନଲାଖି ହୋଇଛି।