କେଉଁଠି କାହାର ଘର

ସବୁଠୁ ବୁଦ୍ଧିଆ ମଣିଷ ମାଧିଆ
ନିଜର ସୁରକ୍ଷା ପାଇଁ
ଧରଣୀ ଉପରେ ଗଢିଥାଏ ଘର
କାହାକୁ ସେ ଡରେ ନାଇଁ ।
ଗୋଡ଼ି ସିମେଣ୍ଟ ଓ ଲୁହାଛଡ ଦେଇ
ମଣିଷ ଗଢେ ତା ଘର
ହାତୀ ବାଘ ଭାଲୁ ଯେତେ ପ୍ରାଣୀ ସବୁ
କାହାକୁ ନଥାଏ ଡର ।
ରୋହି ଭାକୁର ଓ ଚିଙ୍ଗୁଡି କଉଁଛ
ରହନ୍ତି ଗଭୀର ଜଳେ
ଦଣ୍ଡିକିରି ମାଛ ଉପରେ ଭାସନ୍ତି
ତୋଡ଼ି ଘର ପଙ୍କ ତଳେ ।
ସାପ କୋଚିଆ ଓ ନେଉଳ ଯେ ଗୋଧି
ଗାତଟି ତାଙ୍କର ବାସ
ବୁଢିଆଣି ଘର ଜାଲ ପରି ଥାଏ
ମଶା ପାଇଁ ଏହା ଫାଶ ।
କଣ୍ଟିଆ ବିଛା ଓ ଗଉଡୁଣୀ ପୋକ
ରହନ୍ତି ପଥର ତଳେ
ବାଇ ଚଢେଇର ତାଳ ବାହୁଙ୍ଗାରେ
ବସାଟି ସୁନ୍ଦର ଝୁଲେ ।
ଛେଳି ଗାଈଗୋରୁ ବାସଟିର ନାମ
ଗୁହାଳ କହନ୍ତି ଜନେ
ବାଘସିଂହ ହିଂସ୍ରଜନ୍ତୁ ରହିଥାନ୍ତି
ଗୁମ୍ଫା ଥାଏ ଯେତେ ବନେ ।
ଖାଲଖମା ଯେତେ ଅସନା ଜାଗାଟି
ମଶା ମାଛିଙ୍କର ବାସ
ଉକୁଣିର ବାସ ଜାଣ ଘନ କେଶ
ଟାଣଇ ମଣିଷ ରସ ।
ଓଡ଼ଶପୋକଟି ଘର କରିଥାଏ
ଖଟପଲଙ୍କର ଫାଙ୍କେ
ଗାଢ ନିଦରେ ଶୋଇଗଲେ ନର
ଦେହରୁ ରକତ ଝିଙ୍କେ ।
ବିଧିର ବିଧାନ ଜୀବଙ୍କର ପ୍ରାଣ
କିପରି ସୁରକ୍ଷା ହେବ
ବିଶ୍ଵର ନିୟନ୍ତା ଆହେ ବିଶ୍ଵକର୍ମା
ଏ ବିଚାର ତୁମ ଥିବ ।
∎
ରୋଗଡା ପାଳ, କରମୂଳ
ଢେଙ୍କାନାଳ
ଦୂରଭାଷ_୯୯୩୮୮୦୨୪୧୨