କହିବ ନାହିଁ

ବାଧିଲା ଭଳି କଥା ପଦିଏ
କହିବ ନାହିଁ କେବେ
ମଧୁର କଥା କହି ତୋଷିବ
ଦେଖିବ ବନ୍ଧୁ ଯେବେ ।
ବୁଝି ବିଚାରି କହିବ କଥା
ହେବନି ତରବର
ପାଟିରୁ କଥା ବାହାରି ଗଲେ
ଅଫେରା ଧନୁଶର ।
କଥା ବଳରେ ହୁଅଇ ପରା
ସାରା ଦୁନିଆଁ ବଶ
ପରକୁ କରି ଦିଏ ନିଜର
ଦୁଃଖରେ ଦିଏ ହସ ।
କଥା ହୁଡିଲେ କଳହ ବଢ଼େ
ଅଶାନ୍ତି ଆସେ ମାଡ଼ି
ଭଲ ଭିତରେ ହୁଅଇ ମନ୍ଦ
ପିଠିରେ ବାଜେ ବାଡ଼ି ।
କହି ଜାଣିଲେ କଥା ସୁନ୍ଦର
ସଭିଙ୍କୁ ହୁଏ ଜିଣି
ବିନୟ କଥା କହିଲେ ସଦା
ମନକୁ ନିଏ କିଣି ।
ଯାହାକୁ ତୁମେ କଥା ଦେଇଛ
କଥାର ଭାଉ ରଖ
ଗୁପତ କଥା କହିବ ନାହିଁ
ଦେବନି କା`କୁ ଦୁଃଖ ।

ଗ୍ରାମ/ପୋ -ତୋଟାପଡା
ଭାୟା -ଘଣ୍ଟେଶ୍ଵର
ଜିଲ୍ଲା -ଭଦ୍ରକ ୭୫୬୧୨୯
ମୋବାଇଲ ୯୯୩୭୬୭୨୭୦