ଲିସା ଦିଶା ଦୁହେଁ ହସିଲେ

ଲିସା ଦିଶା ଦୁହେଁ ଅଳି କଲେ ଆସି
ଚାଲ ବାପା ଯିବା ଗାଆଁକୁ,
ସହରରେ ରହି ଜାଣି ପାରୁ ନାହୁଁ
ରଜ ଖାଲି ଶୁଣୁ ନାଆଁକୁ ।
ଆମ୍ବ ତୋଟା ନାହିଁ ରଜ ଦୋଳି କାହିଁ
ରଜକୁ ପାଳିବୁ କିପରି,
ସଜ ହେବୁ ସିନା ଏଇଠି ଟିକିଏ
ଖୁସି କି ମିଳିବ ସେପରି ।
ଗାଆଁର ଦୋଳି ତ କଟକଟ ଡାକେ
ଗୀତ ଗାଇ ଦୁହେଁ ଝୁଲିବୁ,
ସଜ ଆମେ ହୋଇ ରଜ ପାନ ଖାଇ
ଗାଆଁ ସାରା ଆମେ ବୁଲିବୁ ।
ସାଇ ପଡ଼ିଶାଙ୍କ ଘରକୁ ଯାଇକି
ମିଳିମିଶି ସବୁ ଖାଇବୁ,
ଲୁଡୁ ପୁଣି ପୁଚି ଖେଳିବୁ ସେଇଠି
କେତେ ଖୁସି ଆମେ ହୋଇବୁ ।
ଦେଖିବୁ କବାଡି ପାଇକ ଖେଳକୁ
ମେଳାରେ ବୁଲିବୁ ହରଷେ,
ବିଦ୍ୟାଳୟ ଛୁଟି ଏବେ ମନା କଲେ
ଅନାଇବ କିଏ ବରଷେ ।
ଦୁଇ ଝିଅଙ୍କର ଅଳି ଦେଖି ବାପା
ଗାଆଁ ଯିବା ପାଇଁ କହିଲେ,
ତାଙ୍କ କଥା ଶୁଣି ବଡ଼ ପାଟି କରି
ଲିସା ଦିଶା ଦୁହେଁ ହସିଲେ ।

∎
ବାଉଁଶିଆପଡା, ନୟାଗଡ଼
୮୨୭୦୩୭୨୪୯୮