ରହିଯା ପରଜାପତି

ରହିଯା ପରଜାପତି
ଯାଆନା ଉଡି
ତୋ ପାଇଁ ରଖିଛି ମୁହିଁ
ଫୁଲ ସଜାଡି ।
ଝୁଡ଼ିରେ ରଖିଛି ଦେଖ
ଟଗର ହେନା
ଗେଣ୍ଡୁ ମାଳତୀ ଚମ୍ପା
ଭାରି ବାସନା
ମନ୍ଦାର ଫୁଲଟି ମୁହଁ
ନାଳିଆ କରି
ରାଗରେ ଚାହିଁଛି ତୋତେ
ଫୁଲେଇ ଭାରି ।
ଅତର ଲଗାଇ ଦେହେ
ମଧୁ ମାଳତୀ
ମଉନେ ବସିଛି ହାତେ
ଧରି ଆଳତୀ ।
ସରାଗରେ ମଲ୍ଲୀ ଫୁଲ
ସଫେଦ ପାଟ
ପିନ୍ଧି ଚାହିଁ ରହିଅଛି
ତୋହରି ବାଟ ।
ସେବତୀ ସଜାଇ ମୁହଁ
ସୁନ୍ଦର କରି
ତୋତେ ଭାବି ମନ ତାର
ଯାଉଛି ମରି ।
ରଜନୀଗନ୍ଧା ର ବାସ
ଚହଟି ଯାଏ
ତୋ ପାଇଁ କା ସାଥେ ସେହୁ
କଥା ନହୁଏ ।
ଯାଆନା ପରଜା ପତି
ଆମକୁ ଛାଡି
ଆମ ସାଥେ ତୋର ଭାବ
ହୋଇବ ଯୋଡି ।

∎
ଡିହଡୋଳ,ପରଜଙ୍ଗ,ଢେଙ୍କାନାଳ
ମୋ-୮୦୧୮୮୮୪୮୦୬