ନୂଆ ବରଷ
ହରିହର ଶୁକ୍ଳ
ଜାନୁଆରୀ: 2026
Canonical: https://sishu.kabitawithoutborders.org/shishu/article_details-e56c224442.html

ନୂଆ ବରଷ ତୁ - 

  ଖୁସି ନହବତ ବଜେଇ ଦେ`

  ଅଭାବ କଷଣ ହଜେଇ ଦେ`

  ଜନ ମାନସରୁ ଦୁଃଖ ଅମା ଟାଳି 

  ନିରାଶ ପରାଣେ ଆଶାଦୀପ ଜାଳି 

  ଧୂଳି ଧୂସରିତ ଧରଣୀ ବୁକୁରେ 

  ସରଗ ସୁଷମା ସଜେଇ ଦେ`

  ସବୁରି ମନକୁ ମଜେଇ ଦେ`।

ନୂଆ ବରଷ ତୁ - 

  ମମତାର ଫୁଲ ଫୁଟେଇ ଦେ`

  ଶରଧା-ସୁବାସ ଛୁଟେଇ ଦେ`

  ଜାତି-ଧରମର ଭେଦାଭେଦ ଭାବ 

  ନ ପାଉ ମଣିଷ ମନତଳେ ଠାବ 

  ପର- ଆପଣାର ବିଚାରଧାରାକୁ 

  ସବୁରି ମନରୁ ତୁଟେଇ ଦେ`

  ସଭିଙ୍କୁ ଏକାଠି ଜୁଟେଇ ଦେ`।

ନୂଆ ବରଷ ତୁ - 

  ନୂଆ ବାଟ ଗୋଟେ ବତେଇ ଦେ`

  ସେବାରେ ସଭିଙ୍କୁ ମତେଇ ଦେ`

  ଶାନ୍ତିର ମଧୁ ସଙ୍ଗୀତ ଗାଇ 

  ହୁଅନ୍ତୁ ସଭିଏଁ ଆନନ୍ଦରେ ବାଇ 

  ସତ୍ୟ, ଅହିଂସାକୁ  ଆଦରିଛି ଯିଏ

  ଅଚିରେ ତାହାକୁ ଜିତେଇ ଦେ`

  କାଳ ତା` ସୁଖରେ  ବିତେଇ ଦେ`।

∎ 

  ବି-୧୦/୧୪୫,କେନ୍ଦ୍ରୀୟ ବିହାର

  ତମାଣ୍ଡୋ,ଭୁବନେଶ୍ଵର-୨୮

  ଫୋ:୯୮୬୮୮୦୫୯୯୬