ଓଡ଼ିଶା ମାଟିରେ ଜନମ  ନେଇଛେ
ଅଜୟ କୁମାର ସେଠୀ
ଫେବୃଆରୀ: ୨୦୨୫
Canonical: https://sishu.kabitawithoutborders.org/shishu/article_details-e27f76e5f2.html

ଓଡ଼ିଶା ମାଟିରେ ଜନମ ନେଇଛେ 

                                  ସିଏ ପରା ଆମ ମାଆ 

                                  ତା ପାଣି ପବନେ ଗଢ଼ା ଏ ଜୀବନ 

                                  ସବୁରି ଅଟେ ସେ ସାହା । 

                                  ତା କୋଳରେ ବହେ ନଦୀ ଓ ଝରଣା 

                                  ମିଶନ୍ତି ସାଗରେ ଯାଇ 

                                  ବିଲ,ବନ,ଘର ଆହାକି  ସୁନ୍ଦର 

                                  ପଟ୍ଟାନ୍ତର ତା`ର ନାହିଁ । 

                                  ଏ ମାଟିର ଆମ ପ୍ରଭୁ ଜଗନ୍ନାଥ 

                                  ପୂଜନ୍ତି ସାରା ଜଗତ 

                                  ବାରମାସେ ତା`ର  ତେର ପର୍ବ ହୁଏ 

                                  ମିଛ ନୁହେଁ ଏହା ସତ । 

                                  ରାମାୟଣ,  ଗୀତା, ଭାଗବତ  ପୋଥି 

                                  ଅମୂଲ୍ୟ ରତ୍ନ ଆମର 

                                  ଯାହାକୁ ଛୁଇଁଲେ ଅବା ପାଠକଲେ 

                                  ପବିତ୍ର ହୁଏ ଅନ୍ତର । 

                                  ଧଉଳିଗିରି ଓ ଖଣ୍ଡଗିରି କହେ 

                                  ଅଶୋକଙ୍କ ବୀର ଗାଥା 

                                  ବଦଳାଇଥିଲା ଏହି ମାଟି ତାଙ୍କୁ 

                                  ନଇଁ ଥିଲା ତାଙ୍କ ମଥା । 

                                  ଏ ମାଟିରେ ବୀର ପାଇକ କାହାଣୀ 

                                  ଶୁଣିରଖ ବାରମ୍ବାର 

                                  ମାଟି ମା ପାଇଁ ଜୀବନକୁ ଦେଇ 

                                  ରହିଛନ୍ତି ସେ ଅମର । 

                                  ଏ ମାଟିରୁ ମୁଠେ ଚିପୁଡିଲେ ଏବେ 

                                  ବୀର ରକ୍ତ ପଡ଼େ ଝରି 

                                  ସେ ରକ୍ତ ଶିଖାଏ ଆମକୁ ଏକତା 

                                  ମନେ ପଡ଼େ ପୂର୍ବ ପିଢ଼ି । 

                                  ବାଜିଆ,ଧରମା  ଏ ମାଟି ସନ୍ତାନ 

                                  ଜାତି ପାଇଁ ପ୍ରାଣ ଦେଲେ 

                                  କେତେ ବୀର ଯୋଦ୍ଧା ଜାତି ପାଇଁ ଲଢ଼ି 

                                  ସ୍ବାଧୀନ ଆମ ଆଣିଲେ । 

                                  ତାଙ୍କ ପାଇଁ ଆମେ ଗର୍ବ କରୁଅଛେ 

                                  ନମସ୍ୟ ସିଏ ଆମର 

                                  ଓଡ଼ିଶା ମାଟିର କୀର୍ତ୍ତି କାରୁକାର୍ଯ୍ୟ 

                                  ନାହିଁ ତା`ର ପଟ୍ଟନ୍ତର  । 

                                  ଓଡ଼ିଶା ମାଟିରେ ଜନ୍ମ ହୋଇଅଛେ 

                                  ରଖିବା ଜାତିର ଟେକ 

                                  ଅସ୍ମିତା ତା`ର  ବଜାୟୀ ରଖିବା 

                                  ଆମ ପାଇଁ ସେ ଆଲୋକ । 

                                              ∎  

                                  ଗ୍ରାମ-ଅଞ୍ଜିରା ,ପୋ-ଓହ୍ଲାଣ ,ଭାୟା- ନିରାକାରପୁର 

                                  ଜିଲ୍ଲା -ପୁରୀ,ପିନ୍-୭୫୨୦୧୯ 

                                  ମୋ-୯୯୩୭୧୯୮୮୭୮ 

                                   ଫୋନ   700304225