ଫୁଲ, କିଏ ହେବ ତୋର ତୁଲ
କବିଜ୍ୟୋତି ନିରଞ୍ଜନ ପତି
ମଇ: ୨୦୨୫
Canonical: https://sishu.kabitawithoutborders.org/shishu/article_details-d8a32a7ea2.html

ଆମର ସଂସ୍କୃତି ପର୍ବପର୍ବାଣୀ ରେ


                                  ଫୁଲ ର ଗୁରୁତ୍ଵ ବହୁତ,


                                  କେଉଁ ପରବରେ ଫୁଲ ଲୋଡା ନାହିଁ


                                  ଏଇ କଥାଟିକୁ କୁହତ !


                                  ଶନି ଦେବ ପ୍ରିୟ ସେ ଅପରାଜିତା


                                  ଦେବୀଙ୍କର ପ୍ରିୟ ମନ୍ଦାର,


                                  ଶ୍ବେତ ପଦ୍ମ,ମଲ୍ଲୀ ସରସ୍ବତୀ ପ୍ରିୟ


                                  ଦେଖିବାକୁ ବଡ଼ ସୁନ୍ଦର ।


                                  ଅରଖ, ଦୁଦୁରା,ଚମ୍ପା ନାଗେଶ୍ଵର


                                  ଅଟେ ଶିବ ପ୍ରିୟ ସୁମନ,


                                  ରାଧାକୃଷ୍ଣ ପ୍ରିୟ ଯୁଇ କୁନ୍ଦ ମଲ୍ଲୀ


                                  ଶୋଭା ପାଇଥାନ୍ତି ବିମାନ ।


                                  ଜନମ ଦିନରେ ଫୁଲ ତୋଡା ଦିଅ


                                  ଫୁଲ ମାଳ ଶବ ଦେହରେ,


                                  ନେତାଙ୍କ ବେକରେ ଫୁଲ ହାର ପଡ଼େ


                                  ଶୋଭାଯାତ୍ରା ବୁଲେ ସହରେ ।


                                  ନୂଆ ଅଧିକାରୀ ଆସି କାର୍ଯ୍ୟାଳୟ


                                  ପୁଷ୍ପଗୁଚ୍ଛ ପାଇ ଥାଆନ୍ତି,


                                  ବାବା,ପ୍ରବାଚକ ଫୁଲ ହାର ପିନ୍ଧି


                                  ବକ୍ତୃତା,ଭଜନ ଗାଆନ୍ତି ।


                                  ବାହାଘର ଆଉ ବ୍ରତଘର ପାଇଁ


                                  କୁସୁମର ବଡ଼ ଚାହିଦା,


                                  ସାଥୀକୁ ଦେଲେ ସେ ଖୁସି ହୋଇଥାଏ


                                  ମିଳିଥାଏ ସ୍ନେହ ଫାଇଦା ।


                                  କୋମଳତା ଆଉ ମନ ଜିଣା ରଙ୍ଗ


                                  ସବୁ ଫୁଲ ଦେହେ ରହିଛି,


                                  ପବିତ୍ରତା ସହ ଭକ୍ତି ଭାବ ଆସେ


                                  ତେଣୁ ସେ ଆଦର ପାଉଛି ।


                                  ଫୁଲର ମହିମା ଗାଉଛି ।


                              ∎  


                                  ସମ୍ପାଦକ,ମଧୁମାଳତୀ


                                  ଗାନ୍ଧୀ ମାର୍ଗ, ଅନୁଗୋଳ


                                  ମୋ-୯୯୩୮୧୩୩୫୫୯