ଏଣୁ ଜୀବନ ତା ନାଆଁ
କୈଳାସ ଚନ୍ଦ୍ର ବେହେରା
ସେପ୍ଟେମ୍ବର: ୨୦୨୬
Canonical: https://sishu.kabitawithoutborders.org/shishu/article_details-d639b54265.html

ଗ୍ରୀଷମ ଋତୁର ଆଗମନ  ଆଣେ 

ଜୀବନେ ଯାତନା ନେଇ 

ଫେରେ ଶିରିହୀନ ତତଲା  ମହୀରେ 

ଜୀବନ ସନ୍ଧାନ ଦେଇ l

ଦକ୍ଷିଣ ପଶ୍ଚିମ  ମଉସୁମୀ ବାଆ 

ସାଗର ସଲିଳ ଛୁଇଁ 

ଶୀତଳ ଉଦକ ରେଣୁ ସାଥେ  ଭାସେ 

ଆକାଶେ ବାଦଲ ହୋଇ l

ମାଆ ବସୁମତୀ ରଜସ୍ୱଳା  ହୋନ୍ତି 

ଦେଖି ନଭେ ମେଘ ଠାଣି 

ଲାଜେଇ ବରଷା ଛପି ଛପି  ଆସେ 

କଳା ଓଢଣୀ ଟେ ଟାଣି l

ଚପଳା ଚମକ ଘଡଘଡ଼ି  ଡାକ 

ମେଘ ସଜବାଜ ଦେଖି 

ବିରହିଣୀ ପ୍ରାଣେ  ମଧୁର ମୂର୍ଚ୍ଛନା 

ସଜଳ ଚାତକ ଆଖି l

ବିରହୀ ମୟୂର କଳାପ  ତୋଳିଲେ 

ମୟୂରୀ ଉଠଇ ମାତି 

ଶିଖୀ ନୃତ୍ୟ ଦେଖି  ଆକାଶେ ଦିଶଇ 

ମେଘ ମଲ୍ଲାରର କାନ୍ତି  l

ଜୀବନ୍ମୃତ ପ୍ରାୟ  ଜୀବଜଗତକୁ 

ପହିଲି ବରଷା ଛୁଆଁ 

ସଞ୍ଜୀବନୀ ସମ  ବ୍ୟାକୁଳ ପ୍ରାଣରେ 

ଜୀବନ ସଞ୍ଚାରେ ନୂଆ l

ମିଳନ ପ୍ରତ୍ୟାଶୀ  ବେଙ୍ଗୁଲୀ ଡାକଇ 

ବରଷା ପାଣିରେ ଭିଜି 

ସାଧବବୋହୂଟି ଅଭିସାରେ  ଯାଏ 

କଅଁଳ ଘାସରେ ହଜି l

ଇନ୍ଦ୍ରଧନୁ ଆଣେ  ରଙ୍ଗୀନ ସପନ 

ପ୍ରେମୀଯୁଗଳଙ୍କ ମନେ 

ବୃକ୍ଷ, ଲତା, ପ୍ରାଣୀ ସକଳେ ବିଭୋର 

ବରଷାର ଆଗମନେ l

ପ୍ରକୃତି ହାଟରେ କଅଁଳ  ଫୁଲର 

ପସରା ଭଳିକି ଭଳି 

ନବ ଯଉବନୀ ଜଳାଧାର  ଖେଳେ 

ସମୀରଣ ସାଥେ ଦୋଳି l

କେଦାରେ କେଦାରେ  ସବୁଜିମା ଖେଳେ 

ବାଡ଼ି ବଗିଚାର ବେଶ 

ଦର୍ଶନେ ବିହ୍ଵଳ  ଚଷାଭାଇ ମନେ 

ଉଙ୍କିମାରେ ନୂଆ ଆଶ l

ଆଷାଢ଼େ ମଜାଏ  ଶ୍ରାବଣେ ଭିଜାଏ 

ବଢ଼ି ଆସେ ଯେବେ ମାଡ଼ି 

ତୁଟିଯାଏ ଚାଷୀ ମନର  ଭରସା 

ଜଳେ ବୁଡ଼େ ଘରବାଡ଼ି l

ତେବେବି ବରଷା  ମଙ୍ଗଳଦାୟିନୀ 

ଜଗତ ଜୀବନ ମାଆ 

ଜଳ ବିନୁ ଜୀବ ସୃଷ୍ଟି  ଅସମ୍ଭବ 

ଏଣୁ ଜୀବନ ତା ନାଆଁ l

∎ 

ତେମଳା,  ଶଂଖୋ, କେନ୍ଦୁଝର 

   ମୋ ---9178040155

ପିନ –758022