ବିଷୁବ ସଂକରାନ୍ତି
କୁଞ୍ଜବିହାରୀ  ସାହୁ
ଏପ୍ରିଲ: ୨୦୨୬
Canonical: https://sishu.kabitawithoutborders.org/shishu/article_details-d474d9d5fa.html

ବେଲ ରସରେ ସଜା  ହୋଇଛି 

  କେଡ଼େ ସୁଆଦ ପଣା,

  ପିଅରେ ପିଅ ସାଥୀ  ହୋଇକି 

  କରନି ମନ ଊଣା । ୧ 

ହସଖୁସିରେ ପିଇଲେ  ପଣା 

  ଘର ଭିତରେ ବସି,

  ବୋଉ କହିଲା  ସୁନାଟି ତୁମେ 

  ଯଆରେ ହସି ହସି ।  ୨ 

ଦେଖରେ ପିଲେ ଝାମୁ  ଯାତରେ 

  ଜଳଇ ରଡ଼ ନିଆଁ,

  ଠାକୁରେ ଧ୍ୟାୟୀ  ଦଣ୍ଡୁଆମାନେ 

  ନିଆଁରେ ହେଲେ ଠିଆ  । ୩ 

ବାପା ମା ସାଥେ  କୁନି ପିଲାଏ 

  ଧରିଲେ ନିଜ ହାତ,

  ସାହି ମୁଣ୍ଡକୁ  ସଅଳ ଯାଇ 

  ଦେଖିଲେ ଝାମୁ ଯାତ  । ୪ 

ଦେଖରେ ପିଲେ  ମନ୍ଦିର ଇଏ 

  ଅଛନ୍ତି ହନୁମାନ,

  ତାଙ୍କରି ପରା  ଜନମଦିନ 

  କରରେ ଜୟଗାନ । ୫ 

ମନ୍ଦିର ଯାଇ ଭକତି  ଭରେ 

  ହନୁମାନଙ୍କ ପାଦେ,

  ମୁଣ୍ଡିଆଟିଏ  ମାରିଲେ ପିଲେ 

  ଗାଇଲେ ଶଙ୍ଖନାଦେ  । ୬ 

ଏମିତି ଏଇ  ଖୁସି ପରବ 

  ବିଷୁବ ସଂକରାନ୍ତି,

  ଓଡ଼ିଆଙ୍କର ନୂଆବରଷ 

  ଜାଗେ ଓଡ଼ିଆ ଜାତି  । ୭ 

∎ 

ପାତ୍ରପଡା, ଭୁବନେଶ୍ବର 

  ୭୦୦୮୧ ୪୨୦୪୦