ହେମନ୍ତ ଋତୁଟି ଆସିଛି ବୋଲି
କୀର୍ତ୍ତନ ସାହୁ
ଡିସେମ୍ବର: ୨୦୨୫
Canonical: https://sishu.kabitawithoutborders.org/shishu/article_details-d37864adee.html

ହେମନ୍ତ ଋତୁଟି ଆସି ଅଛି ବୋଲି 

  ଖେଳୁଛି ମୁଁ ଖୁସି ମନେ

  ବରଷା ନାହିଁ କି ଖରା ବେଶି ନାହିଁ

  ପୁଲକିତ ହୃଦ ବନେ ।

ଭାରି ଭଲ ଲାଗେ ଥିରି ଥିରି ବାଆ 

  ପତ୍ର ନାଚେ ଝୁଲି ଝୁଲି

  ସେ ସୁନ୍ଦର ରୂପ ଦେଖିଛି ଯେ ଥରେ

  ପାରିବ କି କେବେ ଭୁଲି !

ଚଉଁରା ମୂଳରେ ମୁରୁଜରେ ମାଆ

  ଆଙ୍କୁଛନ୍ତି କେତେ ଛବି

  ପରିବେଶ ଏବେ ସ୍ୱଚ୍ଛ ନିର୍ମଳ

  କବିତା ଲେଖନ୍ତି କବି ।

ମନ୍ଦିର ବେଢ଼ାରୁ ଘଣ୍ଟ ଧ୍ଵନି ଶୁଭେ 

  ଆହା କି ପବିତ୍ର ଲାଗେ

  ଦୁଃଖୀ ଦରିଦ୍ରଙ୍କୁ ସାହାଯ୍ୟ ପାଇଁକି

  ମନରେ ସରାଗ ଜାଗେ ।

କେତେ ପରକାର ଫୁଲ ଫୁଟି ଅଛି

  ବାଡି ବଗିଚାରେ ଆମ

  ଦେଖି ଦେଲେ ତାହା ଚେତେ଼ଇ ଦେଉଛି

  କରିବାକୁ ନିଜ କାମ ।

ସକାଳ ସକାଳ କଅଁଳ ଖରାରେ

  ଶିଶିର ପାଉଛି ଶୋଭା

  ପୋଖରୀରେ ଦେଖ କଇଁଫୁଲ ଫୁଟି

  ଆହା କେଡ଼େ ମନଲୋଭା ।

  *

∎ 

  ମିଶ୍ର କଲୋନୀ 

  ଶାଳପଡ଼ା , କେନ୍ଦୁଝର 

  ଦୂର ଭାଷ - ୯୪୩୮୪୧୪୭୦୧