ମହତ କାମ
ବସିରନ  ବିବି
ଏପ୍ରିଲ: ୨୦୨୪
Canonical: https://sishu.kabitawithoutborders.org/shishu/article_details-ce4aab29fb.html

ଘୂରି ପୃଥିବୀଟି ଆପଣ ଅକ୍ଷରେ 


                                  ସରଜଇ ଦିନ ରାତି,


                                  ନିଜେ ଜଳି ଜଳି ତାରକା ତପନ 


                                  ବିତରୁ ଅଛନ୍ତି ଜ୍ଯୋତି । 


                                  ତମସା ହରଣ ଦୀପର ଧରମ 


                                  ଜଳୁଥାଇ ନିରନ୍ତର,


                                  ନିଜେ ଘୋରି ହୋଇ ଚନ୍ଦନ କାଷ୍ଠଟି 


                                  ଆନକୁ କରେ ଶୀତଳ । 


                                  କର୍ଷଣ କଷଣ ସହି ମାଟି ମାଆ 


                                  ଫୁଲ ଫଳ ଉପୁଜାଏ,


                                  ତାପ ପାଇ ଜଳ ବାଷ୍ପ ପାଲଟି 


                                  ମେଘମାଳ ସୃଜି ଦିଏ । 


                                  ସବୁରି କଳୁଷ ଧୋଇ ଧାଇ ନେଇ 


                                  ବହିଯାଏ ସ୍ବଚ୍ଛ ନଈ,


                                  ମହତ ଜନଙ୍କ ଏମନ୍ତ ବେଭାର 


                                  ଜଗତ କଲ୍ଯାଣ ପାଇଁ । 


                                  ମହତ ପଦାଙ୍କ ଅନୁସରି ନିତି 


                                  କରହେ ମହତ କାମ,


                                  ଭଲ ମଣିଷରେ ଗଣା ହେବ ତେବେ 


                                  ଜୀବନ ହୋଇବ ଧନ୍ଯ । 


∎