ମହକିବି ଦିନେ ଫୁଲ  ପରିକା
ଅନନ୍ତ କୁମାର  ସେନାପତି
ଜୁଲାଇ: ୨୦୨୬
Canonical: https://sishu.kabitawithoutborders.org/shishu/article_details-ca56e5d08a.html

ଭାରି ଖୁସି ଲାଗେ  ଖେଳିବାକୁ ସାଥେ 

  କଅଁଳ ପାଦରେ ଧାଇଁକି,

  ଅବୁଝା ମନ ମୋ ଘୁରି  ବୁଲୁଥାଏ 

  ନୂଆ ସପନଟେ  ପାଇଁକି       । 

ଖାତିର ନ କରେ କୁହୁଡି  କାକର 

  ଅବା ଖରାତାତି ବରଷା,

  ଖେଳୁ ଖେଳୁ ପଥେ  ଥକିଯାଏ ଯେବେ 

  ମାଆର କୋଳଟି  ଭରସା      । 

ଡରିଯିବି ନାହିଁ  ଉଡିବାକୁ ନଭେ 

  ବଣ ପରବତ ସାଗର,

  ଏଇ ହାତେ ମୋର  ଜନମମାଟିକୁ 

  ଗଢ଼ିଦେବି କେତେ  ବାଗର       । 

କେବେ ଝରିଯିବି ଝରଣା  ପରି ମୁଁ 

  କୁଳୁ କୁଳୁ ଗୀତ  ଗାଇକି,

  ଭଲ ଲାଗେ ଭାଙ୍ଗି ନୂଆ  ଗଢିବାକୁ 

  ଚପଳ ମନରେ  ଥାଇକି         । 

ପାଇଲେ ସିନେହ ଫୁଲ  ପରି ଫୁଟି 

  ମହକି ଉଠିବି ମାଟିରେ,

  ନିତି ଦେଖେ ଯାହା  ସୁନାର ସପନ 

  କିଏ ବା ପାରିବ  କାଟିରେ       । 

ଆନର ଓଠରେ ଫୁଟାଇବି  ହସ 

  ଜ୍ଞାନର ଆଲୋକ ଜଳାଇ,

  ଯଶ ଗଉରବ ଦିନେ ଏ  ମାଟିରେ 

  ମହକି ଉଠିବ  ଖେଳାଇ          । 

∎ 

ବାଣ୍ଠୁପଡା, ରାଜଗାଙ୍ଗପୁର, ସୁନ୍ଦରଗଡ଼ 

  ଫୋନ   7008304225