ଶରତ  କହୁଛି
କବିଜ୍ୟୋତି  ନିରଞ୍ଜନ ପତି
ଅକ୍ଟୋବର: ୨୦୨୫
Canonical: https://sishu.kabitawithoutborders.org/shishu/article_details-c93e6f2063.html

ମୋତେ ଡାକି ଦେଲା ବର୍ଷା ନାନୀ ଗଲା 

  ମୁଁ ତ ଯୁବରାଜ ଶରତ,

  କାଦୁଅ ହଟିଲା ବାଟ ତ ଶୁଖିଲାnbsp;

  ସବୁଜିମା ହେଲା ମରତ । 

  ନଦୀ ପଠା ପାଶେ କାଶତଣ୍ଡୀ ହସେ 

  ଚାମର ପରାଏ ଝୁଲିଲା,

  ସ୍ୱଚ୍ଛ ନଦୀ ଜଳ, ପୁଷ୍କରିଣୀ ନାଳ

  ନାଉରୀ ନାଆଟି ମେଲିଲା । 

  ମୋ ଆସିବା ଦେଖି ଚାଷୀ ଭାଇ ସୁଖୀ 

  ଚାଷ କାମରେ ସେ ଲାଗିଛି,

  ଲକ୍ଷେ ପୋଷା ହେବ ଦାନା ଯୋଗାଇବ 

  ଏଇ ଭାବ ମନେ ଜାଗିଛି । 

  ଯୁଇ,ଜାଇ,ମଲ୍ଲୀ, ମାଳତୀ,ବଧୁଲୀ

  ଫୁଟି ଖେଳାଉଚି ମହକ,

  ମୋ ଋତୁ ସରସା ନାହିଁ ତ ବରଷା 

  ନାହିଁ ଶୀତ,ଖରା ଡହକ ।

  ଧଳା ମେଘ ମାନ ମୋହୁଅଛି ମନ 

  ନିରିମଳ ଚାନ୍ଦ କିରଣ,

  ନାନା ଜାତି ପର୍ବ ମେଳା ମହୋତ୍ସବ 

  ଜନ ମନ କରେ ହରଣ‌। 

  ଆଗକୁ ଦଶରା ଆସୁଅଛି ପରା 

  ମାଆ ଦୁର୍ଗା ହେବେ ପୂଜିତ,

  କି` ସହର ଗ୍ରାମ ହେବ ମନୋରମ

  କେଡ଼େ ବାଗେ ହୋଇ ସଜ୍ଜିତ । 

  ପାଳ ଯାନି ଯାତ ହୋଇକି ମିଳିତ 

  ଦୂର ହେବ ଦୁଃଖ ଯାତନା,

  ଏଇ କୃପା କର ଭଲ ହେଉ ନର 

  ମାଆଙ୍କୁ କରିବା ପ୍ରାର୍ଥନା । 

∎ 

ପ୍ରଗତି  ନଗର,  ଅନୁଗୋଳ 

  ମୋ-୯୯୩୮୧୩୩୫୫୯