ଉକୁଡୁ - ମୁକୁଡୁ
ଶ୍ରୀ ଧୀରେନ ମିଶ୍ର
ଫେବୃଆରୀ : ୨୦୨୬
Canonical: https://sishu.kabitawithoutborders.org/shishu/article_details-c419969d92.html

ଉକୁଡୁ ମୁକୁଡୁ        ଧାଏଁ ଖୁଡୁଖୁଡୁ 

  ମୁକୁଡୁ  କାନ୍ଦିଲା ଭେଁ 

  ବାରି ବୁଦାତଳୁ       ସାରୁଗଛ ମୂଳୁ 

  ବେଙ୍ଗୁଲୀ କଟର  କେଁ । 

  ଛପଲ-ଛପଲ       ଛେଳି  ପଲପଲ 

  ଛେଳିଛୁଆ  ଡାକେ ମେଁ 

  ଚବଲ-ଚବଲ        ପାଣି  ତଲତଲ 

  କଡେଇ ତାତିଲେ  ଚେଁ । 

  ଚବର ଚବର         ଖବର  ଜବର 

  ପାନଖିଆ ପାଟି  ନାଲି 

  ନଙ୍ଗର ପଙ୍ଗର        ଚଙ୍ଗର ଚଙ୍ଗର 

  କହିବୁ ଯା` ଯେତେ କାଲି । 

  ଖସର ମସର         ଯାଏ  ସର-ସର 

  ପିଲାଏ ମାଇଲେ  ତାଳି 

  ଘଷର ଘଷର          ଆହୁରି ଘଷର 

  ବାଟଣ ପିଠଉ  ଥାଳି । 

  ରଡି ଛାଡିଛାଡି      ଆସେ ମାଡିମାଡି 

  ଇଞ୍ଜିନର  ରେଳଗାଡି 

  ପଘା ଭିଡିଭିଡି        ଅଜା ଚିଡିଚିଡି 

  ଗାଈ ରହେ  ଛୁଆଛାଡି । 

∎ 

  ଶୁଶୁଡା, ଅନୁଗୋଳ 

  ମୋ – 7978087891