ଲାଗେନି କେମିତି ସରମ
ହରିହର ଶୁକ୍ଳ
ଜୁନ	: ୨୦୨୬
Canonical: https://sishu.kabitawithoutborders.org/shishu/article_details-c335e3743a.html

ବରଫକୁ ଚାହିଁ ଚକିତରେ  ଦିନେ 

  ପଚାରିଲା ମାଟି  ଉହ୍ମେଇ,

  ସବୁବେଳେ ତୁହି ଶୀତଳ  ରହୁଛୁ 

  କେମିତି କହିଲୁ ଜମେଇ?

 

କଥା ଶୁଣି ତା`ର ବରଫ କହିଲା 

  ଉହ୍ମେଇ ଆଡ଼କୁ  ଚାହିଁକି,

  ଅତୀତ ମୋ ପାଣି,ଭବିଷ୍ୟତ ପାଣି 

  ଗରମ ହେବି ମୁଁ  କାହିଁକି?

ଟିକେ ରହି ସିଏ କହିଲା  ଏଥର 

  ମତି ମୋ ହୋଇନି ଭରମ,

  ମିଛରେ ଆପଣା ବଡ଼େଇ  ଦେଖାଇ 

  ଅଯଥାରେ ହେବି ଗରମ। 

ଦି` ଦିନିଆ ଏଇ ଦୁନିଆରେ ବିହି 

  ଜନମ ଦେଇଛି ଆମକୁ,

  ହରଷ ବିତରି,ଭଲ କାମ କରି 

  ରଖିଯିବା ସିନା  ନାମକୁ! 

ସହଜରେ ଏବେ ଉହ୍ମେଇ  ବୁଝିଲା 

  ବରଫ କଥାର ମରମ,

  ଭାବିଲା, ଥୋକାଏ ବଡ଼େଇ କରନ୍ତି 

  ଲାଗେନି କେମିତି ସରମ?

∎ 

  ଫୋ: ୯୮୬୮୮୦୫୯୯୬