ଲିସା ଦିଶା ଦୁହେଁ ହସିଲେ
ଲକ୍ଷ୍ମୀଧର ନାୟକ
ଜୁନ: ୨୦୨୪
Canonical: https://sishu.kabitawithoutborders.org/shishu/article_details-bb5044b183.html

ଲିସା ଦିଶା ଦୁହେଁ ଅଳି କଲେ ଆସି 


                                  ଚାଲ ବାପା ଯିବା ଗାଆଁକୁ,


                                  ସହରରେ ରହି ଜାଣି ପାରୁ ନାହୁଁ 


                                  ରଜ ଖାଲି ଶୁଣୁ ନାଆଁକୁ । 


                                ଆମ୍ବ ତୋଟା ନାହିଁ ରଜ ଦୋଳି କାହିଁ 


                                  ରଜକୁ ପାଳିବୁ କିପରି,


                                  ସଜ ହେବୁ ସିନା ଏଇଠି ଟିକିଏ 


                                  ଖୁସି କି ମିଳିବ ସେପରି । 


                                     ଗାଆଁର ଦୋଳି ତ କଟକଟ ଡାକେ 


                                  ଗୀତ ଗାଇ ଦୁହେଁ ଝୁଲିବୁ,


                                  ସଜ ଆମେ ହୋଇ ରଜ ପାନ ଖାଇ 


                                  ଗାଆଁ ସାରା ଆମେ ବୁଲିବୁ । 


                                 ସାଇ ପଡ଼ିଶାଙ୍କ ଘରକୁ ଯାଇକି 


                                  ମିଳିମିଶି ସବୁ ଖାଇବୁ,


                                  ଲୁଡୁ ପୁଣି ପୁଚି ଖେଳିବୁ ସେଇଠି 


                                  କେତେ ଖୁସି ଆମେ ହୋଇବୁ । 


                                       ଦେଖିବୁ କବାଡି ପାଇକ ଖେଳକୁ 


                                  ମେଳାରେ ବୁଲିବୁ ହରଷେ,


                                  ବିଦ୍ୟାଳୟ ଛୁଟି ଏବେ ମନା କଲେ 


                                  ଅନାଇବ କିଏ ବରଷେ । 


                                     ଦୁଇ ଝିଅଙ୍କର ଅଳି ଦେଖି ବାପା 


                                  ଗାଆଁ ଯିବା ପାଇଁ କହିଲେ,


                                  ତାଙ୍କ କଥା  ଶୁଣି ବଡ଼  ପାଟି କରି 


                                  ଲିସା ଦିଶା ଦୁହେଁ ହସିଲେ । 



∎  



                                                                  ବାଉଁଶିଆପଡା, ନୟାଗଡ଼ 


                                  ୮୨୭୦୩୭୨୪୯୮