ହସ
ଡଃ  ସ୍ୱର୍ଣ୍ଣ ଲତା ତ୍ରିପାଠୀ
ଅକ୍ଟୋବର: ୨୦୨୫
Canonical: https://sishu.kabitawithoutborders.org/shishu/article_details-ac4777362d.html

ଶିଶୁ ହସିଲେ      ଦୁନିଆଁ ହସେ 

  ସବୁରି ମୁଖରେ ହସ,

  ହସିଲେ ଖୁସି     ଆନନ୍ଦ ମିଳେ 

  ଜୀବନ ମଧୁ ସରସ । 

  ହସି ହସାଇବା    ବୁଦ୍ଧି ଖଟାଇବା 

  ନିର୍ମଳ କରିବା ମନ,

  ମନ ଖୋଲା ହସ  ଝଲକର ଭାବ 

  ଶିହରଇ ମନ ପ୍ରାଣ । 

  ନିର୍ମଳ ବିଚାର      ଶୁଦ୍ଧ ସାକାର 

  ହସ ମନ ପ୍ରଫୁଲ୍ଲତା,

  ଶରୀର ଶିଥିଳ   ମନକୁ ହାଲୁକା 

  ସହଜରେ ସରସତା । 

  ସ୍ବାସ୍ଥ୍ୟ ପାଇଁ ଭଲ ମନ ଖୋଲା ହସ 

  ମାଗଣା ଟନିକ୍ ଭଳି,

  ସହଜରେ ମିଳେ ସବୁଠାରେ ମିଳେ 

  ହସ ଏକ ଶକ୍ତିଶାଳୀ । 

  ହସ ମହୋଷଧି   ସ୍ୱାସ୍ଥ୍ୟର ଉନ୍ନତି 

  ରୋଗର ପ୍ରତିରୋଧକ,

  ନିଜର ସୁରକ୍ଷା    ଶକତି ସହାୟ 

  ସୁନ୍ଦର ମଧୁ ମହକ । 

  ସୁଯୋଗ ପାଇଲେ ହସି ହସାଇଲେ 

  ଦୀର୍ଘାୟୁ ହେବ ଜୀବନ,

  ହସାଇବା ବ୍ୟକ୍ତି ଶକତି ତା` ମତି 

  ଖୁସି ଆନନ୍ଦ ସକ୍ଷମ । 

  ଥଟ୍ଟା,ମଜ୍ଜା ହସ  କେବେ ଲଜ୍ଜା ହସ

  ମୁରୁକି ହସ ହସିବା,

  ଭାବରେ ଅନେକ ବାରତା ଦେଇକି 

  ହସ ଦୁନିଆଁ ବାଣ୍ଟିବା । 

∎ 

(ରାଷ୍ଟ୍ରପତି ପୁରସ୍କାର ପ୍ରାପ୍ତ)

ମଣ୍ଡଳ ସହ ଶିକ୍ଷା ଅଧିକାରୀ ପୁରୀ ସଦର ବ୍ଲକ୍,ପୁରୀ,କୋଣାର୍କ।