କଅଁଳ କାକର ଫୁଲ
ଜୟନ୍ତିକା
ଜୁନ: ୨୦୨୪
Canonical: https://sishu.kabitawithoutborders.org/shishu/article_details-a43f7fab71.html

ରାତି ଆକାଶରୁ ଖସି ଖସି ଆସେ 


କଅଁଳ କାକର ଫୁଲ । 


ଗଛ ପତରରେ  ଝୁଲି ଦିଶୁଥାଏ 


ସତେ ଅବା କାନଫୁଲ ॥


ଆଉଁଶି ଦିଅଇ କଠିନ ଧରାକୁ 


ବତୁରା ପରଶ ଦେଇ । 


ଧୂଳିଆ ଧରଣୀ ଶିହରି ଉଠଇ


ନରମ ପରଶ ପାଇ  ॥  


ଧୀରେ ନିଶବଦେ ଓଦା ପଣତରେ 


ପୋଛି ନିଏ ଧୂଳି ଧୂଆଁ ॥ 


ସକାଳୁ ସକାଳୁ ସତେଜ ପୃଥିବୀ


ପାଇ ତା`  ଆଦର ଛୁଆଁ ॥ 


ଆ` ଆ` କାକର ସଙ୍ଗାତ ମୋହର


ଛାତି ତଳେ ପଡ ଶୋଇ । 


ଧୋଇ ଦେ` ମନର ମନ୍ଦ କଥା ଯେତେ 


ଅସରା ଆବେଗ ହୋଇ ॥ 





∎