ନିଜଘର ସୁଖ କାହିଁ  ନମିଳେ
ଲକ୍ଷ୍ମୀପ୍ରିୟା ଦାସ
ଜାନୁୟାରୀ: ୨୦୨୫
Canonical: https://sishu.kabitawithoutborders.org/shishu/article_details-97c34aa887.html

ଗୁଣ୍ଡୁଚି ଆଣିଲା ବାଦାମ ଖୋଳି 


                                  ମାଟି ହୋଇଗଲା ଦେହରେ ବୋଳି 


                                  ପୋଖରୀ ପାଣିରେ ଧୋଇହେଲାନାହିଁ 


                                  ଭାବିଲା ହୋଇବ ପୋଖରୀ ଗୋଳି। 


                                  ଡେଇଁ ଡେଇଁ ଗଲା ତଟିନୀ କୂଳେ 


                                  ଘଡିଏ ବସିଲା ପୋଲାଙ୍ଗ ମୂଳେ 


                                  ଫେରିବା ବାଟରେ ବୁଦା ଗହଳରୁ 


                                  ତୋଳିଲା କଣ୍ଟେଇ କୋଳିରୁ ପୁଳେ। 


                                  ବାୟା ବସିଥିଲା ତାଳଗଛରେ 


                                  ଦୋଳି ଖେଳୁଥିଲା ଛୁଆ ପଛରେ 


                                  ବସାରେ ତାହାର ଅତିଥି ହେବାକୁ 


                                  ଗୁଣ୍ଡୁଚିକୁ ଡାକି କହେ ଆଦରେ। 


                                  ଗୁଣ୍ଡୁଚିର ନାହିଁ ସମୟ ତିଳେ 


                                  କେତେ କାମ ତାର ଆପଣା ବିଳେ 


                                  କଣ୍ଟେଇ କୋଳିରୁ ଫାଳେ ଯାଚି କହେ 


                                  ନିଜ ଘର ସୁଖ କାହିଁ ନମିଳେ। 


 
                                             ∎  



                                  ସୁଦର୍ଶନ ନଗର 


                                  ପୁରୀ-୭୫୨୦୦୨