ସପନ ମୋ ଭାଙ୍ଗିଯାଏ
ଜୟନ୍ତିକା
ଜାନୁୟାରୀ: ୨୦୨୪
Canonical: https://sishu.kabitawithoutborders.org/shishu/article_details-953a3ffb60.html

ବିଶ୍ଵମ୍ଭର  ନାମ ତାର ଡାକ ନାମ ବିଶି 

                                   ଦେହ  ଦିଶେ ନଡ଼ନଡ଼ ମୁହଁ ଖୁସି ଖୁସି  । 

                                   ଧରିଥାଏ  ବାଡ଼ି ଖଣ୍ଡେ ନିଜ ଠାରୁ ବଡ଼ 

                                   ବାଡି  ଚାରିପଟେ ବେଢିଥାଏ ତାର ଗୋଡ଼ । 

                                   ଆମେ  ଯେବେ ଖେଳୁ ଥାଉ ଏକା ଥାଏ ବସି 

                                   ପାଖରେ  ଶୁଆଇ ବାଡ଼ି ତାଳି ମାରେ ହସି । 

                                   ଖେଳୁଖେଳୁ  ବଲ  ଯଦି ଗଡ଼ି ଯାଏ କେବେ 

                                   ନଇଁ   ପଡ଼ି ଗୋଟେଇକି ଫିଙ୍ଗିଦିଏ ତେବେ । 

                                   ତା  ଆଖିରେ କଣ ଥାଏ ମୁଁ ତାରେ ଚାହେଁ 

                                   ଘଡ଼ିଏ  ଉଦାସ ହୋଇ କାହିଁକି ବା  ରହେ । 

                                   ସପନରେ  ଦେଖେ ମୁହିଁ ହୋଇଛି ଡାକ୍ତର 

                                   ବଙ୍କା  ଗୋଡ଼କୁ ସଜାଡ଼ି ପାରୁଛି ବିଶିର । 

                                   ବିଶି  ଚାଲୁଛି ଦର୍ପରେ କଥା କହିକହି 

                                   ହାତରେ  ତା ଡେଙ୍ଗା  ବାଡ଼ି ଆଉ ଦିଶୁ ନାହିଁ । 

                                   ସପନ  ମୋ ଭାଙ୍ଗିଯାଏ କାହାର ଡାକରେ 

                                   କବାଟ  ଖୋଲିଲେ ବିଶି ଦୁଆର ପାଖରେ ।