ଟିକି ବଗିଚାର ଫୁଲ କଢି
ରତ୍ନାକର ନାୟକ
ଡିସେମ୍ବର: ୨୦୨୫
Canonical: https://sishu.kabitawithoutborders.org/shishu/article_details-943d440ace.html

ଟିକି ବଗିଚାର ଫୁଲ କଢି 

  ଅତି ଯତନେ କେ ଦେଲା ଗଢି। 

          ପାଖୁଡ଼ା ମେଲିଲେ ହସିହସି 

  ସରଗରୁ ସୁଧା ପଡେ ଖସି।

ବାଉଳା ହୁଅଇ ମହୁମାଛି 

  ପରଜାପତିଏ ନାଚିନାଚି ।

    ଖେଳିବେ ତୋ ସାଥେ ଡାଳେ ଝୁଲି 

  ଗୁଣୁ ଗୁଣୁ ଗୁଣୁ ଗୀତ ବୋଲି।

ସେମାନେ ତୋଅର ସାଥୀ,ମିତ 

  ସାଧୁଥାନ୍ତି ସଦା ଆନ ହିତ।

         ପର ଉପକାରେ ଯା`ର ମନ 

  ସେଇ ସିନା ଏକା ସାଧୁ ଜନ ।

କରମ ଜୀବନ ମାପକାଠି 

  ଯଶ ନମିଳିଲେ ସବୁ ମାଟି।

 

  ଜୀବନ କାଳ ତୋ ଲମ୍ବା ନୁହେଁ 

  ହେଲେ ରୂପ,ଗୁଣ ମନ ମୋହେ ।

ଅଧିକ ବରଷ କେହି ବଞ୍ଚି 

  ନାଆଁ ରଖିଛି କି ଧନ ସଞ୍ଚି ।

        ମରତକୁ ଦାନ ତୋର ମହୁ

  ସରିବନି ଗୁଣ ଯେତେ କହୁ ।

ଆମେ ପିଲାମାନେ ବେଳ ଜାଣି 

  ଘାସ ବାଛି ଗଛେ ଦେବୁ ପାଣି ।

         ଅକାଳେ ଯିବୁନି ଝଡି ପଡ଼ି



  ସକାଳେ ଫୁଟିବୁ ଫୁଲ କଢି। ∎