ଆମ ଜେଜେ
ସୁଜିତ କୁମାର ମିଶ୍ର
ଜୁଲାଇ: ୨୦୨୫
Canonical: https://sishu.kabitawithoutborders.org/shishu/article_details-8d314a0960.html

ହାତେ ଧରି ବାଡି ଆକଟ କରନ୍ତି  

         ସକାଳରୁ ସଞ୍ଜ ଯାଏ,  

  ଅବୁଝା ହୋଇଲେ  ଗାଳି ଦେଇ ସାରି  

        ଦୁଃଖ କରିଥାନ୍ତି ସିଏ  ।

ଗୋଡ ତଳେ ବସି  ଭୁଲ ମାଗୁ ତାଙ୍କୁ

        ଧରି ଆମ ଦୁଇ କାନ,  

  ତାଙ୍କ ରାଗ ରୋଷ  ଉଭେଇ ଯାଏଟି  

         ତୁଟେ ସବୁ ଅଭିମାନ ।  

 ସିଏ ଆମ ଜେଜେ  ଘରର ମୁରବି

         ସବୁକୁ ନିଅନ୍ତି ସହି,

  ଅମାପ ସେନେହ ଶରଧା ତାଙ୍କର 

         ଆମ ବାଧା ନିଏ ଧୋଇ । 

ବଡ ବଡ ନିଶ  ଆଖିରେ  ଚଷମା  

        ଜେଜେଙ୍କ ଥନ୍ତଲା ପେଟ,  

  ଅଶୀ ବୟସେ ବି ହସରେ ଖୁସିରେ  

       ସହଜେ ଚାଲନ୍ତି ବାଟ । 

ପଢନ୍ତି ପୁରାଣ  ଗୀତା ଭାଗବତ  

        ଗାଧୋଇ ସାରିବା ପରେ,  

  ନୀତିଶିକ୍ଷା କେତେ  କହନ୍ତି ବୁଝାଇ  

        ମଜା ଗପ ମାଧ୍ୟମରେ ।

ଜେଜେମା କହନ୍ତି  ତୁମ ଜେଜେ ପରା  

         ପରାଧୀନ ବେଳ ଲୋକ,

  ତାଙ୍କ ଠାରେ ଦେଖୁ  ଗାନ୍ଧୀ ଗୋପବନ୍ଧୁ

       ନେତାଜୀଙ୍କ ନୀତି ଯାକ । 

ଆମ ଜେଜେ ପାଇଁ  ଘରଟି ସତେକି             

ଲାଗଇ ସରଗ ସମ

  ସକଳେ ନମିବା ତାଙ୍କ ଚରଣରେ  

  ସେ ପରା ଦେବତା ଆମ । 

∎  

ଜନାର୍ଦ୍ଦନପୁର ଶାସନ 

  କେନ୍ଦୁଝର

  ୭୬୮୩୮୬୭୭୪୨