ଆସିବ ପୁଣି ନୂଆ ବରଷ
ଡ. ବିଜୟା ପାତ୍ର
ଡିସେମ୍ବର: ୨୦୨୫
Canonical: https://sishu.kabitawithoutborders.org/shishu/article_details-822ed2e817.html

ଚାହୁଁ ଚାହୁଁ ଗଲା ଏଗାର ମାସ 

  କ୍ଯାଲେଣ୍ଡରରୁ ସରି 

  ବସିଛି ଏକା ଡିସେମ୍ବର ଟା 

  ଶୀତରେ ଥରି ଥରି। 

  କମ୍ବଳ ଟିଏ ଦେଲ, 

  ନହେଲେ ପରା ଥଣ୍ଡାରେ ସିଏ 

  ହୋଇବ  କଲବଲ। 

ଗଛରୁ ଯେତେ ଶୁଖିଲା ପତ୍ର 

  ଝରି ପଡଇ ଦେଖ 

  ପତର ଜାଳି ସେଇ ନିଆଁ ରେ 

  ଦେହ ହାତକୁ ସେକ। 

  ବନାଅ ଟିକେ ଚାହା, 

  ଗରମ ଗରମ ପିଇଲେ ତାକୁ 

  ଆରାମ ଲାଗିବ ଆହା। 

ଧାନ କ୍ଷେତରେ ପାଚିଛି ଧାନ 

  ଧାନ ତ ନୁହେଁ ସୁନା 

  ସେ ସୁନା ଦେଖି ଚଷା ଭାଇ ଟି 

  ହୁଅଇ ଆନମନା। 

  ଅମାର ଭରି ଯାଉ, 

  ଭୋକିଲା କେହି ନ ରହୁ ଆଉ 

  ମେଣ୍ଟୁ ରେ ଭୋକ ଦାଉ। 

ବାଡି ବଗିଚା ନାନା ଜାତିକା 

  ଫୁଲ ଫଳରେ ଭରା 

  ପରବ ପୁଣି ଭଳି ଭଳିକା 

  ରହିଛି ମାସ ସାରା। 

  ଏ ମାସ ଗଲେ  ସରି, 

  ଆସିବ ପୁଣି ନୂଆ ବରଷ 

  ମନେ ଉଲ୍ଲାସ ଭରି। 

∎ 

କୋଟି ତୀର୍ଥ ଲେନ୍ 



  ଭୁବନେଶ୍ୱର-୨