କାଳିଆ ସୁନା
ପ୍ରବାସିନୀ ମିଶ୍ର
ଜୁଲାଇ: ୨୦୨୪
Canonical: https://sishu.kabitawithoutborders.org/shishu/article_details-810efbdcfd.html

ଆସରେ କୁନା ଆସରେ ମୁନା


ଦେଖ୍‌ ଯିବା ଆମ କାଳିଆ ସୁନା ।


ବଡ଼ଦାଣ୍ଡ ଲାଗେ ଭାରି ଗହଳ


ବୁଲି ଆସେ ଜଗା ପଡ଼େ ଚହଳ ।


ଟାହିଆ ହଲାଇ ପହଣ୍ଡି ହୋଇ


ତିନିରଥେ ବିଜେ ଚାରି ଗୋସାଇଁ ।


ଆଗରେ ତାହାର ବଳିଆ ଭାଇ


ମଝିରେ ଭଉଣୀ ହଳଦୀ ମୁହିଁ ।


ଜଗତନାଥ ସେ ପଛରେ ରହି


ଝୁଲିଝୁଲି ଆସେ ନାଟ ଲଗାଇ ।


ପେଁକାଳୀ ଘଣ୍ଟେ ଦୁଲୁକେ ମହୀ


ଡାହୁକ ଡାକଇ ବେତ ହଲାଇ ।


ଭାବର ଠାକୁର ଭାବେ ମଜିଛି


ପାଟ ଦଉଡ଼ିରେ ବନ୍ଧା ହୋଇଛି ।


ପୃଥିବୀ ପ୍ରସିଦ୍ଧ ରଥଯାତରା


ମନ ଭରିଯିବ ଦେଖଲେ ପରା ॥





∎  



ପୁରୀ