ଖରା ଦିନରେ ମିତ
ତପନ କୁମାର ସ୍ୱାଇଁ
ଜୁନ	: ୨୦୨୬
Canonical: https://sishu.kabitawithoutborders.org/shishu/article_details-7e92279e76.html

ସୁଲୁ ସୁଲୁଆ ପବନ ଟିକେ 

  ଦେହକୁ ଛୁଇଁ ଯାଆ,

  ପିଇ ହେଉନି ଖରା ଦିନରେ 

  ଗରମ କଫି,ଚାହା । 

ମନ ଚାହୁଁଛି ଶୀତଳ ଜଳ 

  ପଣା,ସର୍ବତ,ଲସି ,

  ହେଉ ପଛକେ ତିନି ଦିନର 

  ଦହି ପଖାଳ ବାସି । 

ଖରା ବେଳରେ ଗଛର ଛାଇ 

  ମୁଣ୍ଡରେ ଓଦା କନା,

  ସୂରୁଯ ତେଜ ବଢିଲେ ଆଉ 

  ବାହାରେ ଯିବା ମନା । 

ଗଛରେ ନାହିଁ କାଉ,କୋଇଲି 

  ଶୁଭୁନି କା`ର ଡାକ,

  ଦାଣ୍ଡରେ ବାଲି ତାତି ଫୁଟୁଛି 

  ପଶୁନି କେହି ପାଖ । 

ଖରା ଦିନରେ ବରଷା ନାହିଁ 

  ନାହିଁ ବି ଥଣ୍ଡା ଶୀତ,

  ସୁଲୁସୁଲୁଆ ପବନ ଆ`ରେ 

  ହୋଇଯା` ଆମ ମିତ । 

∎ 

ଅଇବିଲି,ତିର୍ତ୍ତୋଲ, ଜଗତସିଂହପୁର 

  ମୋ – ୯୦୪୦୦୩୩୩୯୦