ସେଇ ମୋ  ଓଡିଶା ମାଆ
କୈଳାସ ଚନ୍ଦ୍ର  ବେହେରା
ମଇ: ୨୦୨୬
Canonical: https://sishu.kabitawithoutborders.org/shishu/article_details-7d51eb7e94.html

ବୀର ପ୍ରସବିନୀ  କଳିଙ୍ଗ ଜନନୀ 

  ଉତ୍କଳ ବଣିକ ମାଆ 

  ମନ୍ଦିର ମାଳିନୀ  ପ୍ରକୃତି ଶୋଭିନୀ 

  ଓଡିଶା ଯାହାର ନାଆଁ l

  ବଙ୍ଗୋପସାଗର ନୀଳ ଜଳ  ଢେଉ 

  ବନ୍ଦନା ଯାହାର ଗାଏ 

  ସବୁଜ ବନାନୀ, ଶୁଭ୍ର ନିର୍ଝରିଣୀ 

  ଯା ଦେହକୁ ଛୁଇଁ ଯାଏ 

  ଗରଭେ ସମ୍ପତ୍ତି  ରଖିଛି ସାଇତି 

  ପରବତ କରି ଠିଆ 

  ସେଇ ମୋ ଓଡିଶା ମାଆ l

  ଅତୀତ କୀରତି ଭଗ୍ନ  ବାରବାଟୀ 

  ପାଇକ ବୀରତ୍ୱ ଗାଥା 

  ବୌଦ୍ଧ ସ୍ତୁପ ଧଉଳିର  ଶିଳା ଗାତ୍ର 

  ଶୁଣାଏ ଶାନ୍ତିର କଥା 

  ଜଳ ପକ୍ଷୀ ମେଳେ  ଚିଲିକାର ଶୋଭା 

  କେଡେ ମନଲୋଭା ଆହାଃ 

  ସିଏ ମୋ ଓଡିଶା ମାଆ l

  ଓଡିଶୀ ସଙ୍ଗୀତ, ନୃତ୍ୟ, ଚିତ୍ରପଟ 

  ବୋଇତ ବଣିଜ କଥା 

  ମୂକ ସାକ୍ଷୀ ଭଙ୍ଗା  କୋଣାରକ ଗାଏ 

  ଉତ୍କଳ ବଢ଼େଇ ଗାଥା 

  ସ୍ଥାପତ୍ୟ, ସଂସ୍କୃତି, କଳା, କିରତିରେ 

  ଜଗତରେ ଯାର ନାଆଁ 

  ସେଇ ମୋ ଓଡିଶା ମାଆ l

  ଲଙ୍ଗଳ ମୁନରେ ସୁନାର  ଫସଲ 

  ଯା ଦେହୁ ଫଳାଏ ଚଷା 

  ବାର ମାସେ ତେର ପରବ  ପର୍ବାଣୀ 

  ଓଡ଼ିଆଣୀ କରେ ଓଷା 

  ଯେଉଁ ରାଇଜରେ ବିଜେ  ଜଗନ୍ନାଥ 

  ସେ ରାଇଜର ମୁଁ ଛୁଆ 

  ଧନ୍ୟ ମୋ ଓଡିଶା ମାଆ l

∎ 

  ତେମଳା, ନନ୍ଦିପଦା. କେନ୍ଦୁଝର  (ଓଡିଶା )