ତୁମ ଦୁଆରରେ ଶଙ୍ଖନାଦ  ଶୁଭେନାହିଁ
କୈଳାସ ଚନ୍ଦ୍ର  ବେହେରା
ଜୁଲାଇ: ୨୦୨୬
Canonical: https://sishu.kabitawithoutborders.org/shishu/article_details-7b8f34a601.html

ଅଳକାନନ୍ଦାର ତଟ ଦେଶେ  ତୁମ 

  ପୁଣ୍ୟ ବଦରିକା ଧାମ 

  ବିଷ୍ଣୁନାମ ବହି ପୂଜା  ପାଉଅଛ 

  ଜ୍ୟୋତିପୀଠ ଯାର ନାମ l 

  ହିମଗିରି ଘେରା  ଉତ୍ତରାଖଣ୍ଡର 

  ଉତ୍ତରକୁ ବାଛିନେଲ 

  ଦେବଭୂମି, ସ୍ୱର୍ଗଭୂମି, ତପଭୂମି 

  ନାମରେ ପ୍ରକାଶ କଲ l

  ତୁଷାର ମଣ୍ଡିତ ହୀରକ  ମୁକୁଟେ 

  ହିମକୂଟ ଶୋଭାରାଶି 

  ଦର୍ଶନେ ବିଭୋର ଭକତ  ସକଳ 

  ଭକ୍ତିଭାବେ ଯାନ୍ତି  ଭାସି l

  ଅଳକାନନ୍ଦାରୁ  ଆବିର୍ଭୁତ ହେଲ 

  ଶାଳଗ୍ରାମ ରୂପ ଥାଇ 

  ତପ୍ତକୁଣ୍ଡ ପାର୍ଶ୍ଵ  ଗୁମ୍ଫାରେ ସ୍ଥାପିଲେ 

  ପ୍ରଥମ ଶଙ୍କର ନେଇ l 

  ଗଡ଼ୱାଲ ରାଜା ମନ୍ଦିର  ତୋଳିଲେ 

  ଷୋଡଶ ଶତାବ୍ଦୀ ବେଳେ 

  ପ୍ରତିଷ୍ଠିତ ହୋଇ  ପୂଜା ପାଉଅଛ 

  ଥାଇ ବଦ୍ରିବୃକ୍ଷ ତଳେ  l 

  ସୁବର୍ଣ୍ଣ ଚନ୍ଦୁଆ  ମସ୍ତକେ ବିରାଜେ 

  ଧ୍ୟାନମଗ୍ନ ରୂପ ଦେଖି 

  ଭକ୍ତ ହୃଦଗତେ ଚେତନା  ଜାଗ୍ରତେ 

  ଆଖି ରହିଯାଏ ଲାଖି l 

  ତପ୍ତକୁଣ୍ଡେ ସ୍ନାନ  ରୋଗ ନାଶକରେ 

  ମନରେ ଆଣଇ ଭକ୍ତି 

  କାଜୁ, କିସମିସ, ମିଶ୍ରି, ତୁଳସୀରେ 

  ପୂଜି ଲଭିଥାନ୍ତି  ମୁକ୍ତି l

  ଅକ୍ଷି ତୃତୀୟାରୁ  ଦୀପାବଳୀ ଯାଏ 

  ମର୍ତ୍ତ୍ୟବାସୀ  ଛଅମାସେ 

  କେରଳ ବ୍ରାହ୍ମଣେ  ପୂଜା କରୁଥାନ୍ତି 

  ଦୀପଜାଳି ତୁମ ପାଶେ l 

  ଆଉ ଛଅମାସ ବରଫରେ  ଢାଙ୍କି 

  ଦେବାଳୟ ଥାଏ ରହି 

  ଅକ୍ଷି ତୃତୀୟରେ ପୂଜକ  ଦେଖନ୍ତେ 

  ଦୀପଶିଖା ଥାଏ ଚେଇଁ l 

  ସେ ଛଅ ମାସରେ ଦେବଲୋକ  ବାସୀ 

  ପୂଜନ୍ତି ପ୍ରଦୀପ  ଜାଳି 

  ଦେବତାଙ୍କ ମେଳେ ରହିଣ  ସେ କାଳେ 

  କରୁଥାଅ ନାନା କେଳି l

  ତପୋବନ ଘେରା ମନ୍ଦିରେ  ତୁମର 

  ପ୍ରିୟ ଶଙ୍ଖ ବାଜେ  ନାହିଁ 

  ଦେବତାଙ୍କ ଧ୍ୟାନ  ଋଷିଙ୍କ ତପସ୍ୟା 

  ଭଗ୍ନ ଭୟ ଥାଏ ରହି l 

  ଶଙ୍ଖଚୂଡ଼ ବଦ୍ଧ କଲ  ହୃଷିକେଶ 

  ଲକ୍ଷ୍ମୀ ମାତା ତପ  କାଳେ 

  ମନାଇ ନଥିଲ ବିଜୟ  ଉତ୍ସବ 

  ଶଙ୍ଖ ଫୁଙ୍କି ସେଇ  ବେଳେ l 

  ଶବ୍ଦ ତରଙ୍ଗରେ ବରଫ  ପାହାଡ଼େ 

  ଫାଟ ମାନ ସୃଷ୍ଟି ହୋଇ 

  ତୁଷାର ଝଡ଼ ଵା ହିମ  ସ୍ଖଳନ ରେ 

  ସମ୍ଭାବନା ଆଣେ ନେଇ l 

  ହିମଗିରି ମଧ୍ୟେ ନାଗ  ସର୍ପଙ୍କର 

  ବାସସ୍ଥନ ଥାଏ ରହି 

  ଶଙ୍ଖ ଧ୍ୱନି ତାଙ୍କ  ବ୍ୟଥାର କାରଣ 

  ସେଥିପାଇଁ ବାଜେ  ନାହିଁ l 

  ତୁମ ପ୍ରିୟ ବସ୍ତୁ  ଶବ୍ଦ ନ ଶୁଣିବି 

  ମନରେ ନ ବହି ଦୁଃଖ 

  ପ୍ରସନ୍ନ ଚିତ୍ତରେ  ମରତ ବାସୀଙ୍କୁ 

  ବାଣ୍ଟୁଛ ସରଗ ସୁଖ l 

∎ 

  ତେମଳା, 

 ଶଂଖୋ, 

 କେନ୍ଦୁଝର