ରହିବନି କିଛି ବାଙ୍କ
କୀର୍ତ୍ତନ ସାହୁ
ଅକ୍ଟୋବର: ୨୦୨୪
Canonical: https://sishu.kabitawithoutborders.org/shishu/article_details-790cd73cf8.html

ଏଣୁତେଣୁ ଗୁଡେ କଥା ନ କହିକି 


ଭଲ କଥା ପଦେ କୁହ 


ଖରାପ ଗୁଣକୁ ଦୂରେ ଠେଲି ଦେଇ 


ଶାନ୍ତିରେ ଟିକିଏ ରୁହ । 


ଅନ୍ୟ କିଏ କଲା ନ କଲା ନ ଦେଖି 


                                  ନିଜେ ଚାରା ରୋପି ଦିଅ 


                                  ଯେଉଁ ଚାରା ରୋପି ଦେଲ ସେ ଚାରାର 


                                  ଆଦରେ ଯତନ ନିଅ । 


ବେଶି ଗୁଡେ଼ କାମ ଖଣ୍ଡିଆ ନ କରି 


                                  ଗୋଟେ ଗୋଟେ କାମ କର 


                                  କାମଟି ସହଜ ହୋଇବା ପାଇଁକି 


                                  କାମରେ ମମତା ଭର । 


ଛୋଟ ଉଇ ଟିକେ ଟିକେ ମାଟି ନେଇ 


                                  ଦିଅନ୍ତି ସେ ହୁଙ୍କା ଗଢି 


                                  ଅଳପ ଅଳପ ପଢି ଆଗେଇଲେ 


                                  ଅଧିକ ପାରିବା ପଢି । 


ପିମ୍ପୁଡ଼ିଙ୍କୁ ଦେଖ ଧାଡ଼ି କରି ସିଏ 


                                  ଯାଆନ୍ତି କାମରେ ତାଙ୍କ 


                                  ଶୃଙ୍ଖଳାରେ କାମ କଲେ ଶୀଘ୍ର ହେବ 


                                  ରହିବନି କିଛି ବାଙ୍କ । 


ବୁଝି ଶୁଝି ଠିକ ଭାବେ କରୁଥିଲେ 


                                  କାମ ତ ସହଜ ହୁଏ 


                                  ଖୁସିର ମହକ ଛୁଟି ଆସେ ଯେବେ 


                                  ସଫଳତା ହୃଦ ଛୁଏଁ। 





                                             ∎  


                                  ମିଶ୍ର କଲୋନୀ 


                                  ଶାଳପଡ଼ା,  କେନ୍ଦୁଝର 


                                  ଦୂରଭାଷ - ୯୪୩୮୪୧୪୭୦୧