କଳାକାହ୍ନୁ ମୋ ଭକତି  ଘେନ
ସୁଜିତ କୁମାର ମିଶ୍ର
ସେପ୍ଟେମ୍ବର: ୨୦୨୫
Canonical: https://sishu.kabitawithoutborders.org/shishu/article_details-75c2dfda6c.html

ଦେବକୀ କୋଳେ ଜନମ ନେଇ 

        ରହି  ଯଶୋଦା ପାଶେ

   ମୋହିଲ ବିଶ୍ବ  ଚଗଲାପଣେ 

       ବାଲ୍ୟଲୀଳାର  ବେଶେ ।

ବଇଁଶୀ ଧରି ଚାଲିଲ ବନେ 

       ସାଙ୍ଗ  ସାଥିକୁ ନେଇ

  ଡେରି ହୋଇଲେ ଯଶୋଦା ପ୍ରାଣ 

       କାନ୍ଦଇ  କଇଁ କଇଁ  । 

ଚୋରି କରିଲ କ୍ଷୀର ଲବଣୀ 

          ଶିକାରେ ଥିଲା ଯେତେ

  ଧରା ପଡିକି ମାଆ ହାତରୁ 

         ମାଡ ଖାଇଲ କେତେ  । 

ମାଟି ଖାଇଲ ବୋଲି ଯଶୋଦା 

         ରାଗରେ ହେଲେ କୋପ

  ଆଁ` କରିକି  ଦେଖାଇ ଦେଲ

          ବିଶ୍ବବ୍ରହ୍ମାଣ୍ଡ ରୂପ । 

ଛଳେ ଆସିଲା  ପୁତନା ପୁଣି 

        ନେବାକୁ  ତୁମ ପ୍ରାଣ

  ବିନାଶ କରି   ଦେଖାଇ ଦେଲ 

        ଅସୀମ  ପ୍ରଭୁପଣ  । 

   ଗୋପବାସୀକୁ  ଉଦ୍ଧାର କଲ

          ଗୋବର୍ଦ୍ଧନକୁ ଟେକି

     ଚକିତ ହେଲେ   ସଭିଏଁ ତୁମ 

            ଦିବ୍ୟ ଶକତି ଦେଖି ।

କଳାକାହ୍ନୁ ମୋ ଭକତି ଘେନ 

        ଅବୋଧ  ପିଲା ମୁହିଁ

  ଆଶିଷ ତୁମ   ପ୍ରାପତ  ହେଉ 

ସାରା  ଜନମ ପାଇଁ 

∎  

   ଜନାର୍ଦ୍ଦନପୁର ଶାସନ 

  କେନ୍ଦୁଝର 

  ୭୬୮୩୮୬୭୭୪୨