ହାତ  ଅଟଇ ବନ୍ଧୁ
ଦୀନବନ୍ଧୁ  ପୋଇ
ଫେବୃଆରୀ: ୨୦୨୫
Canonical: https://sishu.kabitawithoutborders.org/shishu/article_details-6e0d9f0cf4.html

କେଡେ ସୁନ୍ଦର ମୋ ଦୁଇ ବନ୍ଧୁ

                                  ପାଖରେ ମୋର ଥାଇ

                                  ଯାହା ମୋ ଲୋଡା କହିଲା କ୍ଷଣି

                                  ଦିଅନ୍ତି ସେ ଯୋଗାଇ ।

                                  ଖାଇଲା ବେଳେ ପାଟିକୁ ସିଏ

                                  ଖୁଆଇ ଦିଏ ଖାଦ୍ୟ

                                  ଗୀତ ଗାଇଲେ ସେ ଦୁହେଁ ମିଶି

                                  ବଜାଇଥାନ୍ତି ବାଦ୍ୟ ।

                                  ଲଜ୍ଜା ବାରଣ କରିବା ପାଇଁ

                                  ପିନ୍ଧାଇ ଦିଏ ବାସ

                                  ଗୋରୁ ଗାଈଙ୍କ ଖାଇବା ପାଇଁ

                                  ଯୋଗାଏ ବି ସେ ଘାସ ।

                                  ମନର କଥା କହିଲେ ତାକୁ

                                  ସବୁ ସେ ମାନି ନିଏ

                                  କଲମ ଧରି ଗୀତ କବିତା

                                  କାଗଜେ ଲେଖି ଦିଏ ।

                                  ସ୍ଵଛ ଅସ୍ବଛ ସବୁ ସେ କରେ

                                  ଆମରି ଇଛା ଭରେ

                                  ଭଲ ଚାହିଁରେ ତାହାଠୁ ଆମେ

                                  ଭଲହିଁ ସିଏ କରେ ।

                                  ଭକତି ପାଇଁ ଗୁରୁଙ୍କୁ ସିଏ

                                  ପ୍ରଣାମଟିଏ ଦିଏ

                                  ତାଙ୍କରି ପରି ବନ୍ଧୁ ଜଗତେ

                                  ନାହିଁରେ ଆଉ କିଏ ?

                                  ସଫାସୁତରା ରଖିଲେ ତାଙ୍କୁ

                                  ରହିବା ଆମେ ଭଲ

                                  ଅସନା କଲେ ସଫା ନକେଲେ

                                  ନିଜର ଶତ୍ରୁ ହେଲ |

                                  ସେ ଦୁହେଁ ଆଉ କେ ନୁହେଁ ପିଲେ

                                  ବାମ ତାହାଣ ହାତ

                                  ଯେତେ କରମ ଲୋଡା ଆମର

                                  ସବୁଥି ପାଇଁ ମିତ ।

 

                                             ∎  

                                  ଗୋରଡ଼ା ପାଳ, କରମୂଳ

                                  ଢେଙ୍କାନାଳ, ଦୂରଭାଷ - ୯୯୩୮୮୦୨୪୧୨