ଗଛ ପଚାରୁଛି କୁହ
ରତ୍ନାକର ନାୟକ
ଏପ୍ରିଲ: ୨୦୨୪
Canonical: https://sishu.kabitawithoutborders.org/shishu/article_details-6de9aeafd9.html

ମଥା ନଇଁ କଥା ପଦେ ପଚାରୁଛି କହତ 


                                  ଅବିଚାର କରେ ଯିଏ ସିଏ କଣ ମହତ?


                                  ସବୁଜିମା ଗୀତ ଗାଇ ଫୁଟାଏ ମୁଁ କୁସୁମ 


                                  ଖରା, ମେଘ, ଜାଡ, ମାଡ ଖାଇ ବାଣ୍ଟେ ଉଷୁମ ॥ 


                                  ସବୁ ଦିନ କଲବଲ କଲ ବିଷ ଧୂଆଁରେ 


                                  ଏନ୍ତୁଡିରେ ସେକୁଥିଲି କାନ୍ଦ କୁଆଁ କୁଆଁରେ ॥ 


                                  ପାଖେ ପାଖେ ରହିଅଛି ଜନମରୁ ମରଣ 


                                  ଅଭାବ ରଖିନି କିଛି ଦେଇନାହିଁ କଅଣ?


                                  ଓଉଷଦ ଫୁଲ ଫଳ ଦେଲି ମନ ଜାଣିକି 


                                  ଭୁଲିଗଲ ଦେବା ପାଇଁ ମୂଳେ ମୁନ୍ଦେ ପାଣିକି ॥ 


                                  ଛାଇ ଦେଲି ଜାଳ ଦେଲି ଟେକାଶୁଳା ସହିଛି 


                                  କଷଣ ଦେଉଛ ଯେତେ,  ମୁହଁ ଖୋଲି କହିଛି ?


                                  କତା ଧରି କୁରାଢିରେ ମତେ କିଆଁ ହାଣୁଛ 


                                  ଜାଣି ଜାଣି ତୁମ ପାଇଁ ବିପଦକୁ ଆଣୁଛ ॥ 


                                  ମୁଁ ନ ଥିଲେ ହେ ମଣିଷ! ତମେ କଅଣ ରହିବ? 


                                  ବିବେକ କୁ ପଚାରିକି ମତେ ଟିକେ କହିବ ॥   


                                  ହସ ଦେଇ ବାସ ବିଞ୍ଚେ   ପବନ ମୋ ଶୀତଳ 


                                  ସୁନାକୁ ଚିହ୍ନି ନପାରି କହୁଅଛ ପିତଳ ॥   


                                  ଯିଏ ଦେଲା ପର ହେଲା, ଏଇଟାକି ଧରମ 


                                  ନିଜ ଗୋଡେ କୋଡି ମାର, ଲାଗୁ ନାହିଁ ସରମ ?


                                  ଏତେ ଦେବାନେବା, ସେବା ଅକାରଣ ଯେଉଁଠି 


                                  ଗଛ ପଚାରୁଛି କୁହ ଦୋଷ ମୋର କେଉଁଠି ?


∎
                                  ଭବାନୀପୁର, ଧର୍ମଶାଳା ,  ଯାଜପୁର