କେତେ ବଡ଼ ହେଲେ ଜାଗିବୁ !
କବିଜ୍ୟୋତି ନିରଞ୍ଜନ ପତି
ସେପ୍ଟେମ୍ବର: ୨୦୨୬
Canonical: https://sishu.kabitawithoutborders.org/shishu/article_details-6b18703d99.html

ବାପା ମାଆ ସଦା ଆକଟ କରନ୍ତି

ଛୋଟ ପିଲା ବୋଲି କହି,

କିଛି ଗୋଟେ କଥା କହିଦେଲେ ତାଙ୍କୁ

ପାରନ୍ତିନି ଜମା ସହି । 

କହନ୍ତି ତୁ` ବଡ଼ ହେଲୁଣି,

ଘରର ସଂସ୍କୃତି ପରମ୍ପରା ଯାହା

ସବୁତ ପାଶୋରି ଦେଲୁଣି । 



ଟିଭି ମୋବାଇଲ୍ ଦେଖି ଦେଲେ ଟିକେ

ଅବା ଚାହା ପିଇ ଦେଲେ,

କହନ୍ତି ଏସବୁ କରନ୍ତିନି ଛୋଟ

କରିପାରୁ ବଡ଼ ହେଲେ । 

ଘର କଥା କିଛି ଶୁଣିଲେ,

କହନ୍ତି ତୁ ମୁଣ୍ଡ ପୂରାନା ଏଥିରେ

ବୁଝିବୁ ତୁ` ବେଶି ଜାଣିଲେ । 



ଛୋଟ ପିଲା କେବେ ଚଗଲା ହୁଏନି

ମାନିଚଳ ଆମ କଥା,

ବଡ଼ ହୋଇଲୁଣି ବୁଝି ପାରୁନାହୁଁ

ବାପା ମାଆଙ୍କର ବ୍ୟଥା । 

ଏଇକଥା ବୁଝି ପାରେନି,

କେବେ ହୁଏ ଛୋଟ କେବେ ହୁଏ ବଡ଼

ଭାବେ, କିନ୍ତୁ କେବେ ହାରେନି । 



ସବୁବେଳେ କେତେ ପଢ ପଢ ହେବୁ

ବଡ଼ ହେଲୁ ବୁଝି ପାରୁନୁ,

ଗପ,ଗୀତ ପଢ଼ି ସମୟ ସାରୁଛୁ

ପଢ଼ା ବହି ସଦା ଧରୁନୁ । 

(କହନ୍ତି)ତୋ`  ପିଛା କେତେ ବା ଲାଗିବୁ

ଛୋଟ ପିଲା ପରି ଅଝଟ କରୁଚୁ

କେତେ ବଡ଼ ହେଲେ ଜାଗିବୁ !

∎ 

ମୋ-୯୯୩୮୧୩୩୫୫୯