ଟୁକୁନା ଋଷିଛି
ସୁଶ୍ରୀ ସଂଯୁକ୍ତା ପରିଚ୍ଛା
ଅଗଷ୍ଟ: ୨୦୨୫
Canonical: https://sishu.kabitawithoutborders.org/shishu/article_details-6635972a90.html

ଏଡିକି ଟିକେ କଅଁଳା ଛୁଆ

                                   ଋଷି ବସିଛି ଆଜି ,

                                   କିଏ ସେ ତାକୁ କହିଲ କିସ

                                   ଘର ମୁରବି ସାଜି ।

                                   କେତେ ସୁଧାର ଟୁକୁନା ଆମ

                                   ଜମା କରେନା ଅଳି ,

                                   ଯାହା କହିଲେ ମାନି ସେ ଯାଏ

                                   କେବେ ଖାଏନା ଗାଳି ।

                                   ଆଜି କାହିଁକି ଋଷି ବସିଛି 

                                   ଘର କୋଣରେ ଯାଇ ,

                                   କିଛି ଖାଉନି କିଛି କହୁନି

                                   କାନ୍ଦୁଛି କଇଁ କଇଁ ।

                                   ଘର ବାହାର ଖୋଜା ପଡ଼ିଲା 

                                   କଅଣ ତାର ଲୋଡ଼ା,

                                   ଆକାଶ ଜହ୍ନ ଚିଲିକା ମାଛ

                                   ଅବା ପବନ ଘୋଡ଼ା ।

                                   ବଡ଼ ସରାଗେ ପାରା କୁକୁଡ଼ା 

                                   ସାଥେ ସେ ଖେଳେ ନିତି ,

                                   ଛେଳି ,ବାଛୁରୀ,ଶୁଆ, ବିଲେଇ 

                                   ସଭିଏଁ ତା'ର ସାଥୀ ।

                                   ଆଖି ଆଗରେ ଛେଳି ଛୁଆର

                                   ଜୀବନ ଗଲା ନାଶ ,

                                   ମାଉଁସ ଖାଇ ସଭିଏଁ ଖୁସି 

                                   ହଜିଛି ତା'ର ହସ ।

                                    ∎ 

                                   ପାଟଣାଗଡ଼, ବଲାଙ୍ଗୀର