ବଣରାଇଜ କଥା
ଶ୍ରୀ କୁଞ୍ଜ ବିହାରୀ ସାହୁ
ଜାନୁୟାରୀ: ୨୦୨୪
Canonical: https://sishu.kabitawithoutborders.org/shishu/article_details-5cd2ab45c2.html

କୁକୁର ଦଳେ ଭୁକିଲେ ଭୋ.. 

                                  ଥରିଲା ଗଞ୍ଜା ଦିହ 

                                  କଣ୍ଟାଝଣ୍ଟାରେ ଧାଉଛି ବେଗି 

                                  ତଳକୁ କରି ମୁହଁ । 

 ବିଲୁଆ କଲା ହୁକେ..ହୋ ରଡ଼ି 

                                  ଆଖୁବାଡ଼ିରେ ପଶି,

                                  ଜାଣିପାରିଲେ ଠେକୁଆମାନେ  

                                  ପଳେଇଗଲେ ଖସି । 

 ଗରଜିଦେଲା ଚିତାବାଘଟି 

                                  ଗଛ ଉହାଡ଼େ ଲୁଚି 

                                  ତରକା ହୋଇ ମାଈ ହରିଣ  

                                  ସହଳେ ଗଲା ଘୁଞ୍ଚି ।  

 ନେଉଳ ଦେଖି ଚଗଲା ସାପ 

                                  ଟେକିଲା ତାର ଫଣା,

                                  କୁଆଡ଼େ ଯିବ ପାଉନି ବାଟ 

                                  ହୋଇଲା ବାଟବଣା । 

 ବଣଭିତରେ ରହନ୍ତି ପଶୁ 

                                  ଥରୁଟେ ରାଗିଗଲେ,

                                  କେହି କାହାକୁ ନ ପାରି ବୁଝି 

                                  ମରାମରିରେ ମଲେ ।