କିଏ ବା ପାରିବ କଳି ତୁମ କରୁଣା
ଅନନ୍ତ କୁମାର  ସେନାପତି
ଏପ୍ରିଲ: ୨୦୨୬
Canonical: https://sishu.kabitawithoutborders.org/shishu/article_details-59e8d0b6f4.html

ଝରଣା କୁ ଶିଖାଇଲ  ବହିବା ପାଇଁ 

  କୁଳୁକୁଳୁ ଶବଦରେ  ନିତି ଝରଇ      । 

ସୂରୁଜ ଦେହରେ ଦେଲ  ଆଲୋକ ଭରି 

  ଧରଣୀ କୋଳରେ ଆସି ପଡଇ  ଝରି    । 

ପକ୍ଷୀଙ୍କ କଣ୍ଠରୁ  ଶୁଭେ ମଧୁର ସ୍ୱର 

  ଲାଗେ ସତେ ଉଭା ଅଛି  ସରଗପୁର     । 

ନାନା ରଙ୍ଗେ ସଜାଇଲ  ଫୁଲ ପାଖୁଡା 

  ପରଜାପତି ର ମନେ ସପନ  ଭରା      । 

କୋଟି କୋଟି ତାରା ରହି  ନୀଳ ଆକାଶେ 

  ଦିବ୍ୟ ଜ୍ୟୋତି  ପ୍ରକାଶନ୍ତି ତୁମ ଆଶିଷେ     । 

କେବେ ଦିନ କେବେ ରାତି  କେବେ ବରଷା 

  ଶୀତ କାକର ରୂପରେ ହୁଅ  ଭରସା       । 

ମୋ ମନରେ ଭରିଦିଅ  ଜ୍ଞାନ ଆଲୋକ 

  ସେଇ ଆଲୋକେ ଚାଲିବି  ଜୀବନଯାକ     । 

ଜଳ, ସ୍ଥଳ, ଆକାଶରେ, ସୂରୁଜ ଦେହେ 

  ଫୁଲ ପାଖୁଡ଼ାରେ ତୁମ  ମହକ ବହେ       । 

କିଏ ବା ପାରିବ କଳି  ତୁମ କରୁଣା 

  ତୁମ ବିନା କିଛି  ନାହିଁ ଜଗତେ ଜଣା       । 

  ∎ 

  ବାଣ୍ଠୁପଡା, ଗଙ୍ଗାନଗର, ୱାର୍ଡ  18

  ରାଜଗାଙ୍ଗପୁର , ଜିଲ୍ଲା   ସୁନ୍ଦରଗଡ଼ 

  ଫୋନ   7008304225