ଅତୁଲ ସୁନ୍ଦର ଦାନ
ଲକ୍ଷ୍ମୀଧର ନାୟକ
ଅକ୍ଟୋବର: ୨୦୨୫
Canonical: https://sishu.kabitawithoutborders.org/shishu/article_details-4c50116a63.html

ଆସିଛି ଶରତ ଆମ ଏ ମରତ 

  ପାର୍ବଣର ଋତୁ ଇଏ,

  ଶ୍ବେତ କାଶତଣ୍ଡି ଏ ଋତୁ ଏରୁଣ୍ଡି 

  ଆସିବା ସୂଚନା ଦିଏ । 

ଗହୀରମଥାରେ ନଈ ପଠା ପରେ 

  ରାସ୍ତା ଘାଟ ଦୁଇ ପାଶେ,

  ଭାରି ମନ ଲୋଭା ପ୍ରକୃତିର ଆଭା 

  କାଶତଣ୍ଡି ପାଇଁ ଦିଶେ । 

ଲାଗେ ଶ୍ବେତ ଶାଢ଼ୀ ହୋଇଅଛି ଘୋଡି 

  ଧରଣୀ ମାଆ ତା ଦେ‌ହେ,

  ଏମିତି ତା ରୂପ ଥରେ ଦେଖେ ଯିଏ 

  ନଜର ଅଟକି ରହେ । 

ଜଗତ ଜନନୀ ଆଗମନ ଜାଣି 

  ଚାମର ହଲାଏ ସିଏ,

  ପବନରେ ଝୁଲି ଗୀତ ଗାଏ ଫୁଲି 

  ତା`ପରି ହେବରେ କିଏ ?

ତାକୁ ଯେ ଦେଖିଚି ଭୁଲି କି ପାରିଛି 

  ସ୍ବତନ୍ତ୍ର ତାହାର ସ୍ଥାନ,

  ଶରତ କାଳରେ ଧରଣୀ କୋଳରେ 

  ଅତୁଲ ସୁନ୍ଦର ଦାନ । 

∎ 

ବାଉଁଶିଆପଡା, ନୟାଗଡ଼ 

  ୮୨୭୦୩୭୨୪୯୮