ନଈ ଆରପଟେ
ଡକ୍ଟର ଅରୁଣ କୁମାର ପଣ୍ଡା
ଡିସେମ୍ବର: ୨୦୨୫
Canonical: https://sishu.kabitawithoutborders.org/shishu/article_details-48bfae82c8.html

ନଈ ଆରପଟେ ଚାକୁଣ୍ଡା ଗଛ 

  ଛାଇ ତଳେ ଜଳେ ଖେଳଇ ମାଛ 

  ସୁଲୁସୁଲୁ ବହେ ବାଆ 

  ନଈ ପାରି ବେଳେ ବାଟୋଇଭାଇରେ 

  ଘଡ଼ିଏ ବସିକି ଆ   । 

ଟପ୍ ଟାପ୍ ପଡ଼େ ଚାକୁଣ୍ଡା ଫଳ 

  ଗାଈ ଖାଉଥାନ୍ତି ଗଡ଼ାଇ ଲାଳ 

  ପାକୁଳି କରନ୍ତି ଶୋଇ 

  ସୂରୁଜ ଉଠିଲେ ମୁଣ୍ଡ ଉପରକୁ 

  ବାଟୋଇ ମାରଇ ହାଇ  । 

ପିଲାଏ ଖେଳନ୍ତି ଡାଳମାଙ୍କୁଡି 

  ଦୋକାନୀ ବସିକି ବିକେ କାକୁଡ଼ି 

  ନିଅ! ନିଅ ! ବୋଲି ଡାକେ 

  ଖାଇବା ପାଇଁକି ଇସୁକୁଲ ପିଲା 

  ଅନାନ୍ତି ଝରକା ଫାଙ୍କେ  । 

କା`ର ନ ସରଇ ପତର ଗୋଟା 

  ଆଙ୍କୁଡିରେ ଝିଙ୍କି ଭାଙ୍ଗେ କେ  ଝଟା 

  ରଜେ ଝୁଲୁଥାଏ ଦୋଳି 

  ଗାଆଁ ଝିଅମାନେ ଗାଉଥାନ୍ତି ଗୀତ 

  ପିଲାଏ ମାରନ୍ତି ତାଳି।  

∎ 

 ଗ୍ରା/ପୋ -ତୋଟାପଡା 

  ଭାୟା -ଘଣ୍ଟେଶ୍ଵର 

  ଜିଲ୍ଲା -ଭଦ୍ରକ-୭୫୬୧୨୯ 

  ମୋ -୯୯୩୭୬୭୨୭୦୮