ମେଘ ବଜାଏ ଡମ୍ବରୁ
ଧ୍ରୁବ ଚରଣ ଘିବେଲା
ଜୁଲାଇ: ୨୦୨୫
Canonical: https://sishu.kabitawithoutborders.org/shishu/article_details-43c747c56f.html

ଏଇ ଦେଖୁ ଦେଖୁ 

  ଫେରିଗଲା ଜ୍ୟେଷ୍ଠ 

  ରହିଲାନି ଖରା ତାଉ 

  ଜ୍ୟେଷ୍ଠ ଗଲା ପରେ 

  ଆସିଛି ଆଷାଢ଼ 

  ବଢ଼ାଇ ବର୍ଷାର ଭାଉ I

  ଆକାଶେ ଭାସୁଛି  

  କେତେ ମେଘମାଳା 

  ତିଆରିକି ସେଠି ଘର 

  ମେଘ ଭସାଘର 

  ସୁନ୍ଦର ସୁଦୃଶ୍ୟ  

  ନଅର ମେଘରାଣୀର I

  ମେଘ ଦିଶିଲାଣି  

  ଜ୍ୟେଷ୍ଠ ମାସଠାରୁ  

  ଡମ୍ବରୁ ବଜାଏ ମେଘ  

  ଆକାଶରୁ ଆସି 

  ଦୁଲୁକାଏ ଧରା  

  ଘଡ଼ଘଡ଼ି ଶୁଭି ଆଗ I

  ଆଗ ଘଡ଼ଘଡ଼ି 

  ପଛକୁ ବିଜୁଳି 

  ଚମକ ଖେଳେ ନଭରେ 

  ଆକାଶଠୁ ମାଟି 

  ସବୁଠି ତା` ବ୍ୟାପ୍ତି

  ଛନକା ପଶେ ଛାତିରେ I

  ମେଘର ଡମ୍ବରୁ 

  ବାଜେ ଆକାଶରୁ  

  ହରଷେ ମାଟିକୁ ଛୁଏଁ  

  ଡମ୍ବରୁ ଶବଦ 

  ଡେଙ୍ଗୁରା ବୁଲାଇ  

  ମେଘର ବାରତା ଦିଏ I

  ମେଘ ଡମ୍ବରୁର 

  ସଠିକ ବାରତା 

  ପାଇ ଚାଷୀ ହୁଏ ଖୁସି 

  ଘଡ଼ଘଡ଼ି ସାଥେ 

  ବିଜୁଳି ପ୍ରକଟେ 

  ବରଷା ଯାଏ ବରଷି I

∎  

ବଉଦରାଜ -762014, ଜି. ବୌଦ୍ଧ

  ମୋ.9437478466