ସାତ ରଙ୍ଗର ଝୋଟି
ତପନ  କୁମାର ସ୍ବାଇଁ
ଅକ୍ଟୋବର: ୨୦୨୫
Canonical: https://sishu.kabitawithoutborders.org/shishu/article_details-3a34a6c8bc.html

ଏତେ ସୁନ୍ଦର ଧରାରେ ଛବି 

  କିଏସେ ଦେଲା ସକାଳୁ ଆଙ୍କି 

  ଅନ୍ଧାର ଥିଲା ଘୋଟି,

  ସାରା ମୂଲକେ ପକାଇ ଦେଲା 

  ସାତ ରଙ୍ଗର ଝୋଟି । 

ଜାତି ଜାତିକା ଫୁଟିଛି ଫୁଲ 

  ସତେକି ସିଏ ଅମୂଲ ମୂଲ 

  ଅଟକି ଯାଏ ଆଖି,

  କିଏସେ ସିଏ ଫୁଲର ଦେହେ 

  ରଙ୍ଗ ଦେଇଛି ମାଖି । 

ଉଡ଼ି ଉଡ଼ିକା ପରଜା ପତି 

  କୋଉଠି ଥାଏ ଆସଇ କତି 

  ଫୁଲ ଦେହରେ ବସି,

  କି କଥା ତାକୁ କାନରେ କୁହେ 

  ଫୁଲଟି ଦିଏ ହସି । 

ପୂରୁବ ଦିଗେ ନାଲି ସୂରୁଯ 

  ପତର ଫାଙ୍କେ ବୁଣେ ମୁରୁଜ 

  ବିଛେଇ ପଡେ ଖରା,

  ସେହି ଖରାକୁ ଦେହେ ମାଖଇ 

  ମାଟିର ଏଇ ଧରା  ।

ଯେତେ ଖୋଜଇ ଅଗଣା,ବିଲ

  ସାଗର,ନଈ,ପାହାଡ ଖୋଲ

  କେଉଁ ଦେଶ ତା` ଘର,

  ଦେଖନ୍ତି ତାକୁ ଥରିଏ ହେଲେ 

  ଠିକଣା ଥିଲେ ତା`ର ।

∎ 

ମହାନଦୀ  ବିହାର,  କଟକ -୪

  ମୋ  -    ୯୪୩୭୫୯୬୭୫୧