ରାତି ପାହିଲେ ସକାଳ ହେଲେ
ଧ୍ରୁବ ଚରଣ ଘିବେଲା
ଜୁଲାଇ: ୨୦୨୬
Canonical: https://sishu.kabitawithoutborders.org/shishu/article_details-39efc9627d.html

ରାତି ପାହିଲେ ସକାଳ ହେଲେ  

  ଆସେ ନୂଆଦିନଟେ  

  ସବୁରି ମନେ ଭରି ଦିଏ ସେ  

  ସପନ କେତେ କେତେ I  

  ଲୁଚି ଯାଆନ୍ତି ରାତିର ତାରା  

  ସକାଳର ଆଭାରେ  

  ଦିନରେ ଶୋଇ ସଞ୍ଜକୁ ଚେଇଁ  

  ଉଠନ୍ତି ତାରା ଧିରେ I  

  ସୂରୁଯ ଉଇଁ ପୂରୁବ ଦିଗେ  

  ବୁଣେ ସୁନେଲି ଆଭା  

  କେତେ ବଢ଼ିଆ ସେ ରଙ୍ଗ ଆଭା  

  ଅତୀବ ମନଲୋଭା I  

  କୁଆ କାଆରେ ନିତି ସକାଳେ   

  ଭାଙ୍ଗେ ପିଲାଙ୍କ ନିଦ  

  ନିଦରୁ ଉଠି ମୁହଁ ଧୋଇକି  

  ପଢ଼ି ବସନ୍ତି ଆଗ I  

  ସବୁଠୁ ବେଗି ମାଆ ଉଠିକି  

  ସାରି ବାସି ପାଇଟି  

  ଗାଧୁଆ ସାରି ପୂଜା କରନ୍ତି  

  ବଜେଇ ଶୁଭ ଘଣ୍ଟି I  

  ବସା ଛାଡ଼ିକି ଡେଣା ମେଲିକି  

  ପକ୍ଷୀ ଯାଆନ୍ତି ଉଡ଼ି  

  ଦଳକୁ ଦଳ ତଳ ଉପର  

  ଯାଆନ୍ତି ଡେଣା ଝାଡ଼ି I  

  ପକ୍ଷୀ କାକଳି ପଡ଼େ ଉଛୁଳି  

  ମଧୁଝରା ସୁରରେ  

  ଖାଦ୍ୟ ପାଇଁ କି ଉଡ଼ି ଯାଇକି  

  ଫେରନ୍ତି ସଞ୍ଜ ହେଲେ I

  ଗଛରେ ଫୁଟେ ଫୁଟିକି ବାସେ  

  ସୁନ୍ଦର ଫୁଲ କେତେ  

  ଫୁଲ ବାସରେ ଅଗଣା ଭରେ  

  ଖୁସି ବି ଲାଗେ ସେତେ I

  ଫୁଲକୁ ଦେଖି ହୁଅନ୍ତି ଖୁସି  

  କୁନାକୁନି ସଭିଏଁ  

  ଫୁଲପରିକା ଫୁଟି ବାସିବେ  

  ଦିନେ ଆପଣା ଛାଏଁ I  

∎ 

ବଉଦରାଜ -762014, ଜି. ବୌଦ୍ଧ  

  ମୋ. 9437478466