ଧୀର  ପାଣି ପଥର କାଟେ
ନୀଳମଣି ଚାନ୍ଦ
ନଭେମ୍ବର: ୨୦୨୫
Canonical: https://sishu.kabitawithoutborders.org/shishu/article_details-2e3d55dbe2.html

ଛନଛନିଆ ଘାସ ଉପରେ

  କନକନ ସେ ହୋଇ

  ଡେଇଁଡେଇଁକି ଠେକୁଆ ଚାଲେ

  ପାଦକୁ ଥୋଇ ଥୋଇ।



  ତା`କାନ ହୁଏ ହଲ୍ ହଲ୍

  ଦେଖିଛ ଯଦି କୁହ

  କେତେ ବୁଦ୍ଧିଆ  ସେଇ ଠେକୁଆ

  ତାଠୁଁ ଶୁଣିବ ରୁହ ।



  ଭାବି ଭାବିକା କହିଲା ସିଏ

  ଧୀର କଇଁଛ ଚାଲି

  ତା`ସାଙ୍ଗେ ହେଲା ଦଉଡ଼ ଗୋଟେ

  ଲାଗେ ଯେମିତି କାଲି ।



  ଦଉଡ଼ ମାରି ସେ ଆଗ ଗଲା

  ବିଶ୍ରାମ ଟିକେ ନେଲା

  ପ୍ରଥମ ହେବ ନିଶ୍ଚୟ ସିଏ

  ମନରେ ଭାବି ନେଲା।



  ଗଲା ନିଘୋଢ଼ ନିଦରେ  ଶୋଇ

  ଦଉଡ଼ କଥା ଭୁଲି

  ଉଠି ଦେଖିଲା  କଇଁଛ ନାହିଁ

  ପଛକୁ ଯେବେ ବୁଲି ।



  ଥିଇରି ଥିରି କଇଁଛ ଯାଇ

  ଗଲା ଯେ ଟପି ବାଟ

  ଲକ୍ଷ୍ୟ ସ୍ଥଳକୁ ଆଗ ଛୁଇଁଲା

  ଶିଖେଇ ଦେଲା ପାଠ।



  ଧୀର ପାଣି ପଥର କାଟେ

  ଶିଖିବା ଆସ ଆମେ

  ଠେକୁଆ ଗପ ସେଇଠି ସାରି

  ଚାଲିଲା ନିଜ କାମେ ।

∎ 

ମନ୍ତ୍ର ମାନୋର,ଗୋଠପାଟଣା

  ଭୁବନେଶ୍ୱର,ମୋ:୯୫୮୩୨୦୨୩୫୭