ଉପହାର
ଶ୍ରୀ କୁଞ୍ଜବିହାରୀ ସାହୁ
ଅକ୍ଟୋବର: ୨୦୨୪
Canonical: https://sishu.kabitawithoutborders.org/shishu/article_details-2ba1e27824.html

ଏ  ବର୍ଷ ଦଶହରା ଛୁଟିରେ ରୀତୁ ତା ମାମୁ ଘରକୁ ଯାଇଛି । ବୁଲାବୁଲି କରି ଦେବୀ ଦୁର୍ଗାଙ୍କ ମେଢ, ତୋରଣ ଓ  ସାଜସଜ୍ଜା ଦେଖିବ । ଖୁସି ହେଇଯିବ ।

 ମାମୁ  ଘରେ ପହଞ୍ଚୁ ପହଞ୍ଚୁ ତା ମାଇଁ କହିଦେଲେ- ହାପି ବାର୍ଥ ଡେ ରୀତୁ। ରୀତୁ   ଥାଙ୍କସ ଜଣେଇଦେଲା । ତା ଅଜା ଆଈ କୁଣ୍ଢେଇ ଗେଲ କରିଦେଲେ । ରୀତୁକୁ ଆଶୀର୍ବାଦ ଦେଲେ  । ଭଲ ମଣିଷ ହେଇ ଏ ଦୁନିଆରେ ନାଁ ରଖିବାକୁ କହିଲେ । ରୀତୁ ଖିଲିଖିଲି ହସିଦେଲା ।

 ଘରେ  ଜଳଖିଆ ଖାଇଲା ରୀତୁ । ଏତିକିବେଳେ ତା ମାମୁ ଚଟାପଟ କେତାେଟି ଶିଶୁପତ୍ରିକା ବଢେଇଦେଲେ ।  ରୀତୁକୁ ଜନ୍ମଦିନର ଅନେକ ଅନେକ ଶୁଭକାମନା ଜଣେଇଦେଲେ । ରୀତୁ ତୁ ଠିକ୍ ଦିନରେ ପହଞ୍ଚିଛୁ । ଆଜି  ତୋ ଜନ୍ମଦିନରେ   କେକ୍ ବଦଳରେ ଶିଶୁପତ୍ରିକା ଉପହାର  ଦେଲି । ଦେଖ୍ ଦେଖ୍ ଦଶହରା ପୂଜା ପାଇଁ କେତେ ସୁନ୍ଦର ସୁନ୍ଦର, ରଙ୍ଗରଙ୍ଗିଆ  ଶିଶୁପତ୍ରିକା ତୋତେ ଦେଇଛି । 

             ରୀତୁ  ତା ବାପ-ମା ସହ ମହାରାଷ୍ଟ୍ରର ପୁନେ ସହରରେ ରହେ । ଓଡ଼ିଆ ଗପ କବିତା ବହି ପଢିପାରେନା । ସବୁବେଳେ  ସ୍କୁଲ ପାଠ ।   ତେଣୁ ମାମୁଙ୍କ ହାତରୁ ପତ୍ରିକା  ଛଡେଇନେଲା ପୂଜା ସଂଖ୍ୟାର ଶିଶୁପତ୍ରିକା ଦେଖି ଖୁସି ହେଇଗଲା । ମାମୁ...ମାମୁ..ତୁମ ଗପ ଏ  ପତ୍ରିକାରେ ଛପାହେଇଛି । ଭଲ ଲାଗୁଛି । ମାେ ଜନ୍ମଦିନ କଥା ଲେଖାହେଇଛି ।  ମୁଁ  ଏ ପତ୍ରିକାଗୁଡ଼ିକୁ ପାଖରେ ରଖିବି ?

          ରୀତୁର  ମାମୁ ଆଗ୍ରହରେ କହିଲେ - ପଢିବାପାଇଁ ଦେଇଛି । ତୁ ପତ୍ରିକା ପଢିଲେ ତୋ ଜ୍ଞାନ ବଢିବ । ଏ  ଉପହାର ତୋତେ ଭଲ ମଣିଷଟିଏ କରିଦେବ । ତୁ ସଭିଙ୍କୁ କହିଦେବୁ- ମୁଁ ଓଡ଼ିଆ, ମୋ ଭାଷା  ବଢ଼ିଆ ।

             ରୀତୁ  ଖିଲିଖିଲି ହସିଲା,  କହିଲା - ସତରେ ମାମୁ, ତୁମ ଉପହାର ସବୁଠୁ ବଢ଼ିଆ ।   



∎  

 ପାତ୍ରପଡ଼ା, ଭୁବନେଶ୍ବର