ମା ପାଇଁ ଗଛଟିଏ
ଅନ୍ତର୍ଯ୍ୟାମୀ ବେଜ
ନଭେମ୍ବର: ୨୦୨୫
Canonical: https://sishu.kabitawithoutborders.org/shishu/article_details-24725c3d4c.html

ଯଶସ୍ବୀ ପ୍ରଧାନମନ୍ତ୍ରୀ ଜୟନ୍ତୀରେ 

   ମାଆ ପାଇଁ ଗଛଟିଏ,

   ମାଆର ମାତୃତ୍ୱ ସାର୍ଥକ ଲଭିଛି 

   ତା`ର ସମ ଅଛି କିଏ ?

   ବିଶ୍ୱର କଲ୍ୟାଣ ସମାଜ ନିର୍ମାଣ 

   ପରିବେଶ ପ୍ରତି ଧ୍ୟାନ,

   ଜାଗି ଜଗାଇବା ଜନଗଣ ଆଜ 

   ତରୁଲତା ବିଶ୍ୱ ପ୍ରାଣ. 

   ଯୁଗ ଯୁଗାନ୍ତର ପାଦପର ଦାନ 

   ନାହିଁ ଯା`ର ପଟାନ୍ତର,

   ମାଆ ପରି ତା`ର ତ୍ୟାଗ ଧରା ତଳେ

   ଢାଳି ସ୍ନେହ ସୁଧା ଧାର. 

   ଶ୍ୱାସ ପ୍ରଶ୍ୱାସରେ ପ୍ରାଣ ପବନରେ 

   ଅଟେ ସଂଜୀବନୀ ଧାରା,

   ନାହିଁ ତା` ବିକଳ୍ପ ଅଟେ କଳ୍ପବୃକ୍ଷ

   ତ୍ୟାଗ ତା`ର ଅପାଶୋରା.

   ବୃକ୍ଷ ବ୍ରହ୍ମରୂପା ଶ୍ୟାମଳ ସ୍ୱରୂପା 

   ସୃଜନର ସୂତ୍ରଧାରୀ,

   ଧରାରେ ବିରାଜି ନିଜ ସୁଖ ତେଜି 

   ସାଜଇ ପରପୋକାରୀ. 

   ଯା`  ପାଇଁ ବରଷା ମେଣ୍ଟେ କ୍ଷୁଧା ତୃଷl

   ଅମୀୟ ସମ ବାରିଧି,

   ଯା`ର ଚେର ମୂଳ ପତ୍ର ଫୁଲ ଫଳ

   ଅଟେ ରୋଗ ମହୋଷଧି. 

   ଧୈର୍ଯ୍ୟ ସହିଷ୍ଣୁତା ଦାତା ପଣେ ମାତା 

   ସର୍ବଂସହା ବୃକ୍ଷଦେବୀ,

   ମହତ ଜନମ ସୀମାହୀନ ଦାନ 

   ବଇରାଗୀ ସମ ତ୍ୟାଗୀ. 

   ଦିବ୍ୟକାନ୍ତିମୟ ସ୍ବର୍ଗୀୟ ସୁଷମା 

   ନାହିଁ ଯା` କାର୍ପଣ୍ୟଭାବ,

   ସ୍ୱୟଂ ଜଗନ୍ନାଥ ଦାରୁରୁ ସମ୍ଭୁତ 

   ପାଦପ ମହାନୁଭବ. 

   ପ୍ରକୃତି ସୁରକ୍ଷା ଧରିତ୍ରୀ ମା ରକ୍ଷା 

   ଅର୍ଥରେ ବୃକ୍ଷରୋପଣ,

   ବୃକ୍ଷ ହିଁ ଜୀବନ ବୃକ୍ଷ ପ୍ରାଣଧନ 

   ଅମୂଲ ମୂଲ ତା` ମାନ.

   ସଂସାର ପଥରେ ପ୍ରାଣୀ ସୁରକ୍ଷାରେ 

   କରି ପୁଣ୍ୟମୟ ବ୍ରତ,

   ଚିର ବନ୍ଦନୀୟା ଚିର ପୂଜନୀୟା 

   ପାଦେ କରେ ମଥାନତ. 

   🙏🙏🙏

 ∎ 

   ଶିକ୍ଷକ 

   ପଟ୍ଟାମୁଣ୍ଡାଇ, କେନ୍ଦ୍ରାପଡ଼ା.