ପାରବଣ  ଋତୁ
ଧ୍ରୁବ ଚରଣ ଘିବେଲା
ନଭେମ୍ବର: ୨୦୨୫
Canonical: https://sishu.kabitawithoutborders.org/shishu/article_details-2062751dd5.html

ପାରବଣ ଋତୁ  ପାଖେଇ ଆସୁଛି 

  ଆସିବେ  ଦୁରୁଗା ମାଆ 

  ଗାଆଁ ସହରରେ  ଜାକଜମକରେ 

  ପୂଜା  ପାଇବେଟି ମାଆ I

  ସଜେଇ  ହେଲାଣି ପୂଜାମଣ୍ଡପରେ 

  ଦୁରୁଗା  ମାଆଙ୍କ ମେଢ଼ 

  ପାର୍ଶ୍ୱ  ଦେବାଦେବୀ ମଣ୍ଡପେ ବିରାଜି 

  ଜମାଣିଆ ସେଇ  ମେଢ଼ I 

  ମୃଣ୍ମୟୀ  ମୂରତି ଚାଲିଛି ପ୍ରସ୍ତୁତି 

  (ପୂଜା)ମଣ୍ଡପର ଉହାଡ଼ରେ 

  ମହୀଷ  ମର୍ଦ୍ଦିନୀ ତ୍ରିଶୁଳ ଧାରିଣୀ 

  ପୂଜା ପାଇବେ  ଦଶରାରେ I

  ଅଶିଣ ମାସରେ  ଶୁକୁଳ ପକ୍ଷରେ 

  ବିଜୟା ଦଶମୀ  ଦିନ 

  ଢୋଲବାଇଦରେଭେରୀତୂରୀନାଦେ 

  କମ୍ପିବ  ମେଦିନୀ ପୁଣ I

  ସିଂହବାହିନୀ  ମା` ମର୍ତ୍ତ୍ୟକୁ ଆସନ୍ତି 

  ଧରାବତରଣ  କରି 

  ଦୁଷ୍ଟକୁ  ସଂହାରି ସାଧୁ ସନ୍ଥ ପାଳି 

  ଶୁଣିଥାନ୍ତି  ମା` ଗୁହାରି I

  ମାଆଆସିବେ  ବୋଲି ପଡୁଅଛି ହୁରି 

  ଗାଆଁ ସହର  ସବୁଠି 

  ବରଷକୁ ଥରେ  ମାଆ ଆସିଥାନ୍ତି 

  ବିରାଜି  ଏଇଠି ସେଠି I

  ମାଆଙ୍କ  ଆଗମନ ପାଇଁ ବାଢ଼ିଥାଏ 

  ଶରତ ମରତେ  ଶୋଭା 

  ଅଳିଆ ଅସନା  ଯେତେ ଆବର୍ଜନା 

  ନଥାଇକି ଜମେ  ଆଭା I

  ବରଷାର ଭୟ  ଶରତେ ନଥାଏ 

  କାଶ ହସେ  ଶରତରେ 

  ଚାମର ପରାୟେ  କାଶ ହଲୁଥାଏ 

  ବାଟଘାଟ  ସବୁଠାରେ I

  ମାଆଙ୍କ ସ୍ୱାଗତ  ପାଇଁ କରି ବ୍ରତ 

  କାଶ ଥାଏ  ବାଟେଘାଟେ 

  ଅନେଇରହେ ସେ  ମା` ଆସିବା ବାଟ

  ଧବଳ ପାଟର  ଥାଟେ I

  ଆନନ୍ଦ  ଉଲ୍ଲାସ ଆଲୋକର ପର୍ବ 

  ପାରବଣ  ଦଶହରା 

  ମେଲାଣି  ନିଅନ୍ତି ଦର୍ଶନ ଦେଇକି 

  ହରଷେ ସାରି  ଯାତରା I

∎ 

ବଉଦରାଜ -762014, ଜି. ବୌଦ୍ଧ

  ମୋ.9437478466