ବସନ୍ତ  ସମୟ ରଙ୍ଗର ପରବ
କୈଳାସ  ଚନ୍ଦ୍ର ଧଳ
ଏପ୍ରିଲ: ୨୦୨୬
Canonical: https://sishu.kabitawithoutborders.org/shishu/article_details-09d530d5ee.html

କୋଇଲି ଗାଉଛି  କୁହୁ  କୁହୁ ହୋଇ 

  ବଉଳ ଦେଉଛି ବାସ 

  ମଳୟ ପବନ ବହେ ସୁଉ  ସୁଉ 

  ଚହଟାଇ ଚଉପାଶ   |

ହେନା ଜୁଇ ଜାଇ କୁରେଇ  କରବୀ 

  ଜିନିଆ ସେବତୀ ଫୁଲ 

  ଜାତି ଜାତି  ଗେଣ୍ଡୁ  ପଳାସ ସୋରିଷ 

  ଫୁଟି ଦିଶେ ଝଲମଲ |

ହଳଦୀ ରଙ୍ଗରେ ହସଇ  ବସନ୍ତ 

  ସବୁଜ ଦିଶଇ ଧରା 

  କଅଁଳିଆ ଖରା ମନ୍ଦ  ସମୀରଣ 

  ବିଲ ବଣ ଶୋଭା ଭରା |

ଏକାଳେ ଫଗୁଣ  ବିଞ୍ଚଇ ଅବିର 

  ଫଗୁ ରଙ୍ଗେ ମନ ତାଜା 

  ଦୋଳ ମଣ୍ଡପରେ  ରାଧାକୃଷ୍ଣଙ୍କର 

  ଫୁଲ ଦୋଳି ହୁଏ ସଜ୍ଜା  |

ଜାତି ଧର୍ମ  ଭୁଲି  ପୁଅ ଝିଅ ମିଳି 

  ହୋଲିରେ ଉଠନ୍ତି ମାତି 

  ବସନ୍ତ ସମୟ ରଙ୍ଗର  ପରବ 

  ଗାଉଥାଏ ମଧୁ  ଗୀତି  |

∎ 

 ମୋବାଇଲ- -88895119944